Adını Cəfər Cabbarlının Azərbaycanda qadın azadlığını təmsil edən “Sevil” pyesindən götürən Sevil Beynəlxalq Qadın Sənədli Film Festivalının açılışı baş tutub. Sayca 3-cü dəfədir ki, baş tutan festival bu dəfə təkcə Bakıda yox, həm də Şəki və Lənkəran şəhərlərində də təşkil olunacaq. Festival 20 avqusta qədər davam edəcək.
Həmtəsisçi Aygün Rəşid deyir ki, bu, yenilikçi bir festivaldır və indiyədək belə bir təcrübə olmayıb:
Təcrübə olmadığı üçün biz hələ bilmirik hansı şəhərdə nə ola bilər, biz onları müzakirə edirik, festivaldan əvvəl onun araşdırmasını edirik. Şəhərlərə səyahətlər edirik, insanlarla görüşürük, gənclərlə məkanlara baxırıq və hər il ağlımıza yeni ideyalar gəlir.
bildirib
Festivalda nələr var: Builki festivalda 30-a yaxın sənədli film nümayiş olunacaq. Seçki komissyasının seçdiyi filmlər 3 kateqoriya üzrə yarışacaq:
- ən yaxşı uzunmetrajlı film;
- ən yaxşı qısametrajlı sənədli film;
- ən yaxşı yerli sənədli film.
Bununla yanaşı festival çərçivəsində çoxsaylı yerli və beynəlxalq uzun, eləcə də qısametrajlı sənədli filmin nümayişi, masterklasslar, panel müzakirələr, filmlərdən sonra müzakirə sessiyaları olacaq. Festivalın ilk günündə iranlı rejissor Firuzə Xosrovaninin “Ailənin rentgenoqramı” filmi nümayiş etdirilib. Bu nümayiş ölkədən çıxışına qadağa qoyulan rejissora dəstək məqsədi ilə edilib.
Təşkilatçılar bildirir ki, festival Almaniyanın “goEast” film festivalı ilə əməkdaşlığa başlayıb və “Sevilfest”-in qalib rejissoru “goEast” tərəfindən təşkil edilən “East-West Talent Lab”da iştirak haqqı qazanacaq.
