2022-ci ilin iyun ayında Avropayönümlü etiraz aksiyaları ərəfəsində “Formula”, “Pirveli” və “Mtavari Arxi” telekanallarında hakim “Gürcü arzusu” partiyasını tənqid edən reklamlar yayımlanıb. Bununla əlaqədar olaraq partiya hər 3 telekanalı məhkəməyə verib.
Gürcüstan Milli Kommunikasiya Komissiyası (GMKK) seçki olmayan dövrdə siyasi reklam yayımladığına görə kanalların cəzalandırıldığını açıqlayıb.
Nə cəza verilib: “Formula” və “Pirveli” ötən illər ərzində başqa bir qanun pozuntusuna yol vermədiyi üçün onlara sadəcə yazılı xəbərdarlıq edilib. Müxalifətə yaxın hesab olunan “Mtavari Arxi” televiziya kanalı illik gəlirinin 1 faizi məbləğində, yəni 119 min lari (təxminən 70 min AZN) cərimələnib. GMKK deyir ki, həmin telekanal 2019-cu ildən bəri ən azı beş dəfə oxşar pozuntuya yol verib.
“Mtavari Arxi” nə deyir: Telekanal bir ildən çoxdur ki, maliyyə böhranı yaşadığını açıqlayıb. Həmçinin kanalın direktoru Nika Qvaramiya may ayında vəzifə səlahiyyətlərindən sui-istifadə və mənimsəmə ittihamı ilə həbs edilib.
Kanalın icraçı direktoru Giorgi Qabuniya kanalın onsuz da maliyyə böhranı yaşadığını və təyin olunan cəriməni ödəməyəcəklərini deyib.
Avropanı təbliğ edən bir video yayımladığımıza görə bir daha cərimə olunduq və bu, əlbəttə ki, məni təəccübləndirmədi. Bizə birbaşa hədə-qorxu gəliblər ki, belə davam etsə və daha bir Avropayönümlü video yayımlasaq, lisenziyamız ləğv oluna bilər. Eybi yoxdur, biz bu cəzanı ödəməyəcəyik. Qərar ilə bağlı apelyasiya şikayəti verəcəyik.
icraçı direktor deyib.
Reklam çarxı nədən bəhs edir: Telekanalların cəzalandırılmağına səbəb olan video Gürcüstanın Avropa İttifaqına üzvlüyə qəbul edilməsi barədədir və “Home to Europe” vətəndaş cəmiyyəti qrupu hazırlayıb. Əhalinin Avropayönümlü aksiyalarda iştirak etmələri üçün çağırış ediən video-çarxda “Gürcü arzusu” partiyasının üzvləri və onların tərəfdarları Rusiyanın Ukraynaya hərbi müdaxiləsini müzakirə edir və Aİ-nin Gürcüstanla bağlı qətnaməsini tənqid edirlər.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiz.
