11 sentyabrda “Xural TV”-nin rəhbəri Əvəz Zeynallı və vəkil Elçin Sadıqov barəsində 4 ay müddətinə həbs-qətimkan tədbiri seçildi. Bu həbs uzun müddət sonra ölkədə ən çox danışılan və etiraz edilən həbs oldu. Onların həbsində əsas rolu jurnalist Eynulla Fətullayev oynadı.
Mikroskop Media bu iki şəxsin 5 gün ərzində necə həbs edildiyinin xronologiyasını təqdim edir.
Jurnalist Eynulla Fətullayev Əvəz Zeynallının vəkil Elçin Sadıqovun müvəkkili Rasim Məmmədovun ailəsindən 20 min AZN rüşvət aldığını iddia etdi. Jurnalistin həmin məbləği Rasim Məmmədovu tənqid etməmək üçün aldğını deyən Fətullayev səs yazısı yayaraq iddiasını əsaslandırmağa çalışdı. Həmin səs yazısında Əvəz Zeynallı bir şəxsə (Elçin Sadıqov olduğu iddia edilir) səsli mesaj göndərir. “Heç bir problem yoxdur, əgər elədirsə, görüşək o məsələni mən iadə edim, qaytarım” – o deyir. Eynulla Fətullayev burada söhbətin puldan getdiyini deyir. Bir gün sonra isə Əvəz Zeynallı açıqlama yayaraq bu iddiaları təkzib edəcəkdi.
Hələlik Oxu.az, BakuTV, Baku.ws, qafqazinfo.az kimi saytlar bu iddianı tirajlayır, Əvəz Zeynallının əleyhinə yazılar və videolar dərc edirdi.
Gecə saatlarında Eynulla Fətullayev Facebook sosial şəbəkəsində “pulu qaytardılar” yazaraq post paylaşdı.
Əvəz Zeynallı səhər saatlarında “Xural TV”-də canlı yayımda ötən gün ərzində baş verənlərə münasibət bildirdi və iddiaları təkzib etdi. Onun sözlərinə görə, yayılan səs yazısında söhbət puldan yox, sənədlərdən gedir. Ə.Zeynallı bildirdi ki, vəkil Elçin Sadıqov ona müvəkkili, “Baku Steel Company” şirkətinin Müşahidə Şurasının sabiq sədri, hazırda həbsdə olan Rasim Məmmədovun cinayət işi ilə bağlı vacib sənədlər verib. Söhbət həmin sənədlərin geri qaytarılmasından gedir.
Eynulla Fətullayev ona dəstək olduqları üçün “Real TV”-nin rəhbəri Mirşahin Ağayevə, “Qafqazinfo” saytının rəhbəri Elbrus Əruda və Qlobal Media Holdinqin idarə heyətinin üzvü Elnur Abdullayevə təşəkkür etdi. Qlobal Media Holdinqə “Oxu.az” və “Baku TV” media orqanları daxildir.
Elə həmin gün Eynulla Fətullayev Vəkillər Kollegiyasının sədri Anar Bağırova müraciət edərək Elçin Sadıqovun kollegiyadan uzaqlaşdırılmasını istədi. O, Elçin Sadıqovu vəkil etikasını pozmaqda ittiham edib.
Elçin Sadıqov “Facebook”da post paylaşaraq prokurorluq əməkdaşlarının onun ofisinə axtarışa gəldiklərini açıqladı. Bir müddət sonra məlum oldu ki, axtarış həm də onun evində aparılır. Elə eyni dəqiqələrdə Əvəz Zeynallının saxlanıldığı və onun da ofisində axtarış edildiyi məlum oldu.
Axtarışdan sonra Əvəz Zeynallı jurnalistlərə qısa açıqlama verməyə imkan tapdı və bildirdi ki, bu, hakimiyyətin azad sözü və internet televiziyalarını susdurmaq planıdır.
Elçin Sadıqovun ofisində isə axtarışlar hələ də davam edirdi. Bitəndə isə məlum oldu ki, vəkilə aid bütün sənədlər götürülüb.
Onların hər ikisi prokurorluğa aparılaraq barələrində cinayət işinin açıldığı elan edildi. Həm jurnalist, həm də vəkil Cinayət Məcəlləsinin 311.3.3-cü, rüşvət amaq maddələri ilə ittiham edildilər.
Elə həmin gecə onlar Binəqədi rayon məhkəməsinə aparıldılar.
Gecə başlayan məhkəmə şənbə günü səhər saat 05:00-a qədər davam etdi. Jurnalist Əvəz Zeynallı və vəkil Elçin Sadıqov barəsində 4 aylıq həbs-qətimkan tədbiri seçildi.
