Azərbaycanla Ermənistan arasında gərginlikdə hər iki tərəfin itkiləri var. Ermənistan açıqlasa da Azərbaycanda rəsmi rəqəmlər açıqlanmır. Lakin qeyri-rəsmi məlumatlara görə, Azərbaycan ordusunun 8 hərbçisi həlak olub. Ermənistanda isə 49 nəfər həlak olub.
Bu yazıda dünən gecədən saat 13:00-a qədər baş verənləri qeyd etmişik.
Ermənistanın Baş naziri Nikol Paşinyan ABŞ Dövlət katibi Entoni Blinkenə zəng edib. Tərəflər Ermənistan-Azərbaycan sərhədindəki vəziyyəti müzakirə edib. Blinken vəziyyətdən narahat olduğunu və vəziyyətin daha da gərginləşdirilməsini yolverilməz hesab etdiyini deyib.
Elə dərhal da Blinken bəyanat yayıb. Bəyanatda deyilir: ABŞ Ermənistan və Azərbaycan sərhədində baş verən toqquşmalardan dərin narahatdır və buna görə də tərəfləri atəşi dərhal dayandırmağa çağırır.
Azərbaycan Xarici İşlər naziri Ceyhun Bayramov ABŞ dövlət katibinin Avropa və Avrasiya məsələləri üzrə köməkçisi Karen Donfridə zəng edib. Zəngdə deyib ki, Ermənistanın genişmiqyaslı təxribat törədib və nəticədə toqquşmalar və gərginlik yaranıb. Karen Donfrid bölgədə artan gərginlik və hərbi toqquşmalardan narahatlığını diqqətə çatdırıb, hərbi əməliyyatların dərhal dayandırılmasına çağırış edib.
Müdafiə Nazirliyinin Beynəlxalq Hərbi Əməkdaşlıq İdarəsinin rəisi general-mayor Hüseyn Mahmudov Azərbaycanda akkreditə olunmuş xarici hərbi attaşelər üçün brifinq keçirib. Bildirilib ki, Ermənistan silahlı qüvvələri Daşkəsən, Kəlbəcər və Laçın istiqamətlərində genişmiqyaslı təxribatlar törədib.
Ermənistan Müdafiə naziri Suren Papikyan və rusiyalı həmkarı Sergey Şoyqu arasında telefon danışığı olub.
Türkiyənin Xarici İşlər naziri Mövlud Çavuşoğlu Azərbaycan-Ermənistan sərhədində baş verənlərə münasibət bildirib.
Dövlət Sərhəd Xidməti Ermənistanın Azərbaycanla sərhəddə Zəngilan rayonu istiqamətində də təxribat törətməyə cəhd etdiyini açıqlayıb.
Ermənistanın Baş naziri Nikol Paşinyan Azərbaycanla sərhəddəki gərginlikdə ölən erməni hərbçilərin sayını açıqlayıb. O, Ermənistan Silahlı Qüvvələrinin 49 hərbçisini itirdiyini bildirib.
Gürcüstan Azərbaycanla Ermənistan arasında gərginliyin azaldılması istiqamətində vasitəçiliyini təklif edib. Bu barədə hakim “Gürcü arzusu” partiyasının sədri İrakli Kobaxidze jurnalistlərə açıqlamasında deyib.
Nikol Paşinyan İran Prezidenti İbrahim Rəisiyə zəng edib. Həmkarına sərhəddə baş verənlərlə bağlı məlumat verib. İbrahim Rəisi Cənubi Qafqaz regionunda yeni müharibənin qəbuledilməz olduğunu və İranın hadisələrin gedişatını diqqətlə izlədiyini deyib.
Azərbaycan Respublikasının müdafiə naziri Zakir Həsənov Türkiyənin milli müdafiə naziri Hulusi Akara zəng edib. O, türkiyəli həmkarına sərhəddə baş verən gərginliklə bağlı məlumat verib. Hulusi Akar Türkiyənin bu gün də Azərbaycanın yanında olduğunu qeyd edib.
Rusiya XİN Azərbaycan və Ermənistan sərhədindəki gərginliklə bağlı bəyanat yayıb.
Bəyanatda deyilir: Biz rəsmi Bakı və Yerəvanla sıx əlaqə saxlayırıq. Ermənistan rəhbərliyindən mövcud ikitərəfli razılaşmalara uyğun olaraq və Kollektiv Təhlükəsizlik Müqaviləsi Təşkilatının (KTMT) vasitəsilə vəziyyətin həllinə kömək göstərilməsi xahişi ilə müraciət daxil olub. Biz gözləyirik ki, Rusiyanın vasitəçiliyi nəticəsində bu il sentyabrın 13-də Moskva vaxtı ilə saat 9.00-dan etibarən atəşkəslə bağlı əldə olunan razılıq tam həcmdə həyata keçiriləcək.