Ermənistan Silahlı Qüvvələrinin Baş Qərargah rəisi Eduard Asryan Azərbaycan hərbçilərinin hərbi cinayət törətdiyini deyir.
Azərbaycan Telegram kanallarından birində Azərbaycan hərbçilərinin Ermənistan Silahlı Qüvvələrinin snayperinin üzərində zorakılıq izləri olan cəsədinin video görüntüləri yayılıb. Videodakı qadının bədəninə “052 YAŞMA” yazıldığı görünür.
Həmin video sentyabrın 15-i səhər saatlarında yayılıb və videoda səs yoxdur.
Bu gün Ermənistan Silahlı Qüvvələrinin Baş Qərargah rəisi Eduard Asryan 30 ölkənin səfir və diplomatlarına həmin görüntülər barədə danışıb.
Diqqətinizə Azərbaycan ordusunun hərbçi qadına qarşı törətdiyi vəhşiliyi çatdırıram. Mənim telefonumda foto və video materiallar var. Onları sizə göstərə bilərəm. Orada elə vəhşiliklər var ki, baxmaq mümkün deyil. Siz orada qadının çılpaq olduğunu, barmağının kəsildiyini, gözünün çıxarıldığını görəcəksiz. Bu, beynəlxalq hüququn pozulmasıdır.
o deyib.
Yayılan video 1 dəqiqə 16 saniyə davam edir.
Görüntünü paylaşan Telegram kanalına 16 sentyabr səhər saatlarına qədər abunə olmadan daxil olmaq mümkün olsa da, sonradan bu dəyişib. Hazırda materialları yalnız kanala abunə olanlar görür və o, +21 xəbərdarlığı ilə paylaşılır.
Həmin snayper kimdir: Öldürülən hərbçinin Suzanna Marqaryan olduğu iddia edilir. Ötən gün Ermənistan mediası Suzanna Marqaryan adlı hərbçinin öldüyü barədə məlumat yaymışdı. Buna baxmayaraq yayılan video görüntülərdəki şəxsin məhz Suzanna Marqaryan olduğu təsdiqini tapmayıb.
Azərbaycanda rəsmi və qeyri-rəsmi məlumatlar nələrdir: Sentyabrın 15-i media.az saytı Baku TV-nin Suzanna Marqaryan adlı hərbçi ilə bağlı hazırladığı reportajı yayımlayıb. Həmin materialda vurğulanır ki, S.Marqaryan terrorçudur.
Azərbaycan hökumətinə yaxın olan Media.az və Baku Tv “Global Media Group”-un tərkibindədir.
Azərbaycan Müdafiə Nazirliyi isə bu iddia ilə bağlı hələlik heç bir məlumat yaymayıb.
