Azərbaycan Respublikası Kosmik Agentliyi – Azərkosmos tender təşkil edib və “Azimut reklam və təchizat” MMC qalib gəlib. Tender haqda məlumatlarda deyilir ki, şirkət 72 min 500 manata “tanıtım malları satın alacaq”.
Azimut MMC-nin isə bu tenderdə iştirak etməsi qanunla mümkün olmamalı idi. Çünki şirkətin 730 manat vergi borcu var. Qanunvericiliyə görə, vergi borcu olan şirkətlər tenderdə iştirak edə bilməz.
Bu, Azimut MMC-nin vergi borcu ola-ola qatıldığı ilk tender deyil. Şirkət bu il başlayandan bəri ümumilikdə 29 tenderin qalibi olub. Bu tenderlərin ümumi dəyəri isə 842 min manatdan çoxdur.
Hansı ayda nə qədər tenderin qalibi olub?
- Yanvar – 1 tender
- Fevral – 2 tender
- Aprel – 2 tender
- May – 1 tender
- İyun – 4 tender
- İyul – 6 tender
- Avqust – 10 tender
- Sentyabr – 3 tender
Şirkət haqda nələr məlumdur?
Nizamnamə kapitalı 20 manat olan şirkət 2 il əvvəl qeydiyyatdan keçib. Şirkətin qanuni təmsilçisi Gülnarə Cəfərovadır. Şirkətin rəsmi veb-saytı olmadığından onun fəaliyyəti ilə bağlı ətraflı məlumat yoxdur. Eləcə də qanuni təmsilçi Gülnarə Cəfərova barədə də əlavə məlumat əldə etmək mümkün deyil. İnternetdə axtarış nəticəsində məlum olur ki, pandemiya dövründə əməkdaşların maaşını ödəmək üçün dövlətin dəstək olduğu şirkətlərdən biri də Azimut MMC-dir.
