Azərbaycanla Ermənistan arasında sonuncu dəfə 44 gün davam edən müharibədən artıq iki il keçsə də hələ də iki ölkə arasında sülh imzalanmayıb və ayrı-ayrı vaxtlarda yenidən gərginlik yaşanır. Sonuncu dəfə 12-13 sentyabr tarixlərində sərhəddə baş verən toqquşmalarda hər iki tərəfdən yüzlərlə hərbçi həlak oldu və yaralandı.
Keçmiş Sovet respublikalarından olan yüzdən çox şəxs iki ölkə arasında sülhə çağırış edən bəyanat hazırlayıb. Bu bəyanata Azərbaycan, Ermənistan, Gürcüstan, Türkiyə, Rusiya, ABŞ, Almaniya, Belçika və digər ölkələrdən olan yüzlərlə şəxs imza atıb.
Bəyanatda nə deyilir: PostSovietPeace tərəfindən dərc edilən bəyanatda deyilir ki, rəsmilər hərbi üsulların münaqişəni həll etmədiyini, iki ölkə arasındakı uçurumu daha da dərinləşdirdiyini başa düşməlidirlər.
Biz postsovet məkanından və onun qonşuluğundakı ərazilərdən olan bir qrup sülhsevər insan olaraq arası kəsilməyən müharibələr və güclənən imperialist rəqabətdən əziyyət çəkirik. Azərbaycanın son vaxtlar Ermənistana qarşı genişmiqyaslı hücumu bizi qəzəbləndirir. Rusiyanın Ukraynaya hücumu, eləcə də Qırğızıstan və Tacikistanın sərhədəyanı bölgələrində hərbi toqquşmaların yenidən başlaması təkcə Ermənistan-Azərbaycan deyil, gələcəkdə postsovet məkanındakı digər münaqişələri də tətikləyəcəyi ilə bağlı ciddi narahatlıq yaradır.
bəyanatda deyilir.
Bəyanat hər iki tərəfə çağırışlar edir və düzgün addımların atılmasını tələb edirlər.
Azərbaycan tərəfi anlamalıdır ki, hərbi hücumla “dəhlizlər” açıla, sülh razılaşması əldə oluna bilməz. Bununla yanaşı, Ermənistan hakimiyyəti 30 il ərzində aparılan sərt danışıq prosesinin vurduğu zərəri, yüz minlərlə azərbaycanlının öz yurd-yuvasından didərgin edildiyini, Ermənistanın güzəştə getməkdən və münaqişəni vaxtında həll etməkdən imtina etdiyini etiraf etməlidir.
Konkret tələblər nələrdir: Bəyanatda vurğulanır ki, regional müharibələr birləşərək qlobal müharibəyə çevrilə bilər. İmzalayanlar bunu əsas gətirərək tələblərini belə sadalayıb:
- Biz sülhə çağırış etmirik, sülh tələb edirik!
- Biz hökumətlərdən güc tətbiq etməmək öhdəliyini öz üzərlərinə götürmələrini, prioritet kimi insan təhlükəsizliyinə əhəmiyyət verən diplomatik həll yolları axtarmalarını, hərbi müdaxilələri dayandırmalarını, eyni zamanda insan münasibətlərini və sülh quruculuğunu davam etdirmələrini tələb edirik.
- Biz rəsmi danışıqlarda iştirak edən beynəlxalq subyektlərdən münaqişənin təsirinə məruz qalan insanların səsinin eşidilməsi, xalqlararası danışıqlar və insan təhlükəsizliyi problemlərinin ən azı rəsmi danışıqlar prosesi ilə eyni səviyyədə olmasını təmin etmələrini tələb edirik.
Bəyanatı necə imzalamaq olar: Bəyanat imzalanmaya açıqdır və qoşulmaq istəyənlər ad, soyadı, yaşadığı ölkə və peşəsi haqında qeyd əlavə edərək postsovietpeace@gmail.com ünvanına göndərə bilər. Bəyanatın tam mətni PostSovietPeace tərəfindən dərc olunub.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiz.
