Çeçenistanda sentyabrın 15-i elan edilən səfərbərliyə qarşı paytaxt Qroznıda etiraz aksiyaları keçirilib. Ölkə rəhbəri Ramzan Kadırov şəxsi “Telegram” kanalında paylaşdığı videomüraciətdə bunu təsdiqləyib. OC Media yazır ki, bu, Kadırovun respublikaya rəhbərlik etdiyi 15 il ərzində hakim rejimə qarşı ilk etiraz aksiyasıdır. Kadırov deyib ki, aksiya Rusiyada sentyabrın 21-i elan edilən qismən səfərbərliyin əleyhinə keçirilib.
Aksiya barədə nə məlumdur: İlk məlumatı müxalifətə yaxın hesab edilən “1 ADAT” teleqram kanalı paylaşıb. Qeyd edilib ki, aksiya sentyabrın 20-i səhər saat 10:00-a planlaşdırılsa da, etirazçılar toplaşana qədər artıq ərazi hasarlanıb.
Sentyabrın 21-də isə kanal məlumat yayaraq mitinqin başlamasına yarım saat qalmış paytaxtın mərkəzində bir qrup qadının toplaşdığını, lakin hamısının Daxili İşlər Nazirliyinin əməkdaşları tərəfindən saxlanıldığını, Qroznı şəhər meriyasına aparıldığını bildirib. Elə həmin axşam Çeçenistanın “Vayfond” hüquq müdafiə təşkilatı Qroznının mərkəzində insanların toplaşdığını əks etdirən foto paylaşıb və oradakıların əsgərlik yaşına çatan oğlanların anaları olduqlarını deyib.
Rəsmi açıqlama nədir: Çeçenistan hakimiyyəti aksiya barədə məlumatı təkzib edib. Bildirilib ki, yayılan foto Ukraynada öldürülən çeçen döyüşçülərin şərəfinə keçirilən dini mərasimdəndir.
Kadırov etirazlar barədə nə deyib: Onun sözlərinə görə, aksiyada 15-20 qadın iştirak edib, onlardan ikisi yeganə oğlunu döyüşə göndərməli olub. Mitinq çağırış yaşı uyğun olan kişilərin anaları tərəfindən keçirilsə də, Kadırov Rusiya prezidenti Vladimir Putinin sentyabrın 21-də elan etdiyi qismən səfərbərliyə qarşı etirazlarda iştirak edənləri “xalq düşmənləri” adlandırıb və onların həbs olunaraq döyüşə göndərilməli olduğunu deyib.
Bundan başqa, ölkə lideri etirazçıların bəzilərini “Avropa təşkilatları” tərəfindən pul almaqda ittiham edib:
bildirib
Onlardan “Nə istəyirsən və niyə buradasan?” soruşanda mənzil və sosial problemləri olduqlarını dedilər. Mən dedim ki, əgər evlərində onları saxlayıb baxacaq kişi yoxdursa… o zaman onlar da Rusiyanın xüsusi əməliyyat keçirdiyi ərazidə olmalıdırlar.
Etirazçılar nə deyib: “1ADAT”ın məlumatına əsasən, aksiyada iştirak edənlər yalnız bir neçəsinin oğlunun Ukraynaya göndərildiyini, digərlərinin isə oğullarının döyüşə çağırılacağından qorxduqları üçün mitinqə qoşulduqlarını deyiblər. Bundan əlavə, teleqram kanalı etirazçılardan birinin mesajını yayımlayıb:
deyilir mesajda
130-a yaxın qadın mitinq zamanı saxlanılıb. Onların hər biri Kadırovun 3-5 adamı tərəfindən aparılıb.
“1ADAT” onu da əlavə edib ki, mitinqdə iştirak edən qadınların oğulları saxlanılaraq Qroznıdan 36 kilometr şərqdə yerləşən Qudermes şəhərinə aparılıblar.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
