Şimali Qafqazın Kabardin-Balkar və Dağıstan Respublikalarında müharibə əleyhinə etiraz aksiyaları zamanı ən azı 100 nəfər saxlanılıb. OC Medianın məlumatına görə, Rusiya prezidenti Vladimir Putinin sentyabrın 21-də qismən səfərbərlik elan etməsindən sonra Dağıstan və Kabardin-Balkar Respublikalarında bir çox şəhərlərdə minlərlə insan küçələrə axın edərək etiraz aksiyalarına başlayıb.
Etirazlar haqda nə məlumdur: Son bir həftə ərzində Dağıstanın Mahaçqala və Xasavyurd şəhərlərində, eyni zamanda Kabardin-Balkarın Nalçik şəhəri və Nartkala qəsəbəsində etiraz aksiyaları keçirilib. Yerli medianın yaydığı məlumata görə, Mahaçqalaya gedən magistral yollar etirazçılar tərəfindən 2 dəfə bağlanıb, onlar havaya atəş açılıraq dağıdılıb.
Bazar ertəsi Nalçik şəhərində hökumət binasının qarşısına toplaşan 100-ə yaxın insanı hakim Vahid Rusiya Partiyasının yerli şöbəsinin katibi Muayid Dadov qarşılayıb. Hadisə yerindən yayılan videolarda onun etirazçılarla mübahisə etdiyi görünüb.
Media nə yazıb: Rusiyadakı siyasi təqiblərin monitorinqini aparan “OVD-info” media layihəsinin çərşənbə axşamı yaydığı məlumata görə, təkcə Mahaçqalada keçirilən etiraz aksiyaları zamanı azı 101 nəfər saxlanılıb.
Dağıstanın “Çernovik” qəzeti bazar ertəsi baş tutan mitinqlərdə yetkinlik yaşına çatmayan 27 nəfərin, həmçinin “Novoe Delo” qəzetinin əməkdaşı İdris Yusupov və “RusNews” xəbər agentliyinin əməkdaşı Sergey Aynbinderin saxlanıldığını yazıb. Bazar günü isə “Kavkazskiy Uzel” saytının jurnalisti Murad Muradov etirazları işıqlandırarkən saxlanılıb. O, aksiyada icazəsiz iştirak etməkdə ittiham olunub.
Sosial şəbəkələrdə isə təhlükəsizlik qüvvələri əməkdaşlarının etirazçıları döydüyünü və onlara qarşı gözyaşardıcı qazdan istifadə etdiyini əks etdirən videolar yayılıb.
Rəsmilər nə deyir: Dağıstanın rəhbəri Sergey Melikov etirazçıları xarici ölkələrin idarə etdiyini iddia edib:
deyib açıqlamasında
90-cı illərdə Dağıstanı qana, çirkaba və yoxsulluğa məhz bu qüvvələr sürükləyib. Biz hələ də bu vəziyyətdən çıxmağa çalışırıq.
Bununla yanaşı, Melikov respublikada səfərbərliklə bağlı qərarı dəstəklədiyini, hətta Şimali Qafqaz respublikalarının ən böyük və ən sıx məskunlaşdığı Dağıstanda səfərbərlik komissiyasına şəxsən rəhbərlik edəcəyini qeyd edib.
Parlamentin spikeri Zaur Əskəndərov isə bildirib ki, qismən səfərbərlik tədbirləri zamanı vətəndaşların hüquqlarının pozulması ilə bağlı müxtəlif orqanlara müraciətlər çoxalıb, və o, insanlara kömək etmək üçün parlamentin tərkibində kiçik qərargah yaradacaq:
deyə vurğulayıb
Rusiya Federasiyası prezidentinin sərəncamı ilə qəbul olunmuş qismən səfərbərlik qaydalarına Dağıstan Respublikasında ciddi şəkildə riayət olunmalıdır.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
