Rusiya prezidenti Vladimir Putin Ukraynanın tərkibindəki qondarma Donetsk və Luqansk Xalq Respublikalarının, həmçinin Zaporojye və Xerson vilayətlərinin Rusiyaya birləşdirilməsi haqqında saziş imzalayıb. TASS agentliyinin məlumatına görə, sənədi Putinlə birgə tanınmamış Donetsk Xalq Respublikası, Luqansk Xalq Respublikasının rəhbərləri, həmçinin Zaporojye və Xerson vilayətlərinin liderləri imzalayıblar.
Mərasimdə çıxış edən V.Putin bu birləşdirmənin milyonlarla insanın istəyi olduğunu deyib:
Əminəm ki, Federal Məclis 4 yeni regionun Rusiya Federasiyasının tərkibinə qatılması haqqında konstitusiya qanunlarını dəstəkləyəcək. Çünki bu, milyonlarla insanın iradəsidir.
bildirib
Rusiya lideri onu da qeyd edib ki, qərar “beynəlxalq hüquq və prinsiplər çərçivəsində, xalqların öz müqəddəratını təyin etmə hüquqlarına əsasən, BMT nizamnaməsinə uyğun formada” qəbul olunub.
Beynəlxalq reaksiya necədir: Avropa Şurası rəsmi saytında yaydığı bəyanatda bildirib ki, Xerson və Zaporojye vilayətlərinin, eləcə də qondarma DXR və LXR-in Rusiyaya birləşdirilməsinə dair keçirilən referendumların nəticələrini tanımayacaq:
Bu qərar etibarsızdır və heç bir hüquqi qüvvəyə malik ola bilməz. Krım, Xerson, Zaporojye, Donetsk və Luqansk Ukraynadır. Biz bütün dövlətləri və beynəlxalq təşkilatları bu qeyri-qanuni ilhaqdan imtina etməyə çağırırıq.
qeyd olunub bəyanatda
Bununla yanaşı, AŞ-nın üzvləri rəsmi Moskvaya iqtisadi və siyasi təzyiqləri artıracaqlarına söz veriblər və Ukraynanı dəstəkləməyə davam edəcəklərini vurğulayıblar.
