Rusiya ilə Krımı birləşdirən Kerç körpüsünün partladılması ilə əlaqədar Rusiya xüsusi xidmət orqanları bir Ermənistan vətəndaşını həbs edib, iki Gürcüstan vətəndaşının isə təqsirləndirildiyini açıqlayıb. OC Media yazır ki, xüsusi xidmət orqanları partlayıcı maddələrin Gürcüstan və Ermənistan vasitəsilə gətirildiyini iddia edir. Gürcüstan vətəndaşları hadisənin iştirakçısı kimi saxlanılıb.
Rəsmi açıqlama nədir: Partlayışdan 4 gün sonra Rusiya Federal Təhlükəsizlik Xidməti (FTX) və İstintaq Komitəsi məlumat yayaraq hadisədə azı 10 nəfərin, o cümlədən Gürcüstan vətəndaşları Sandro İnosaridze, Levan adlı vasitəçi və Ermənistan vətəndaşı Artur Terçanyanın iştirak etdiyini deyib. Qurumun bəyanatında iddia olunur ki, həmin 3 nəfər Ukraynanın Odessa şəhər limanından göndərilən, daha sonra Bolqarıstan, Gürcüstanın Poti limanı, Ermənistan və yenidən Gürcüstandan keçirilən partlayıcı maddələrin daşınmasında iştirak edib.
Təhlükəsizlik xidmətinin məlumatına görə, partlayıcılar Rusiyaya oktyabrın 4-də Gürcüstanın Yuxarı Lars keçid məntəqəsi vasitəsilə yük kimi tikinti polietilen plyonkaların arasında gizlədilərək gətirilib. Rusiyanın digər səlahiyyətli şəxsləri də açıqlamalarında 8 nəfərin həbs edildiyini, onların arasında Ermənistan vətəndaşının da olduğunu deyiblər.
Ermənistan nə deyir: FTX-nin açıqlamasından dərhal sonra Ermənistan Milli Təhlükəsizlik Xidməti iddiaları araşdırmaq üçün cinayət işi başladıb. Ölkənin Dövlət Gəlirləri Komitəsi də nəqliyyat vasitəsinin Ermənistan ərazisinə daxil olması ilə bağlı açıqlama yayıb və qəbul edilmiş “Avrasiya İqtisadi İttifaqının təcrübəsi”nə uyğun olaraq texniki baxış keçirildiyini, bu zaman heç bir şübhəli hal aşkarlanmadığını deyib:
Yüklərin Ermənistana gətirilməsi, onun gömrük nəzarəti, rentgen müayinəsi, gömrük rəsmiləşdirilməsi, sənədləşmə və ixrac prosesləri lazımi qaydada və qanuni şəkildə həyata keçirilib.
bildirilir açıqlamada
Gəlirlər Komitəsinin məlumatında qeyd olunub ki, Gürcüstanda yaşayan Ermənistan vətəndaşı Artur Terçanyanın idarə etdiyi avtomobil sentyabrın 27-də Gürcüstandan Ermənistana daxil olub və oktyabrın 1-də Rusiya istiqamətinə yollanıb.
Gürcüstan nə deyir: Ölkənin Daxili İşlər nazirinin müavini Aleksandr Daraxvelidze və Maliyyə nazirinin birinci müavini Giorgi Kakauridze Rusiya FTX-nin ittihamlarını rədd edib. Kakauridze heç bir yük maşınının TNT və ya digər partlayıcı maddələrlə Gürcüstanın gömrük sərhədindən keçmədiyini bildirib:
Həm siyasətçilər, həm də xüsusi xidmət orqanları sübutlarla təsdiqlənməyən ittihamlar səsləndirirlər. Kimisə nəyəsə görə ittiham etmək asandır, amma bu sübut olunmursa, çılğınlıqdan başqa bir şey deyil.
deyib nazir müavini
Kakauridze əlavə edib ki, yükün Gürcüstan sərhəddindən keçməsi ilə bağlı iddia əsaslandırılarsa, araşdırmalara başlayacaqlar.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
