Bu gün Soçidə Azərbaycan prezidenti İlham Əliyev, rusiyalı həmkarı Vladimir Putin və Ermənistanın baş naziri Nikol Paşinyan arasında üçtərəfli görüş baş tutub. İki saata yaxın çəkən toplantıda birgə bəyanatla bağlı razılığa gəlinsə də, Qarabağla bağlı bütün məsələlər üzrə razılıq əldə edilməyib. Görüşdən sonra yayılan birgə bəyanatda Qarabağla bağlı heç bir ifadəyə yer verilməyib.
Bəyanatda nə deyilir: Azərbaycanla Ermənistan güc tətbiq etməkdən və ya onu həyata keçirəcəyi ilə hədələməkdən çəkinmək barədə razılığa gəliblər. Qeyd olunub ki, tərəflər problemli məsələləri yalnız BMT Nizamnaməsinə və Alma-Ataya uyğun olaraq həll etəcəklər. Bundan başqa, sənəddə aşağıdakı digər məqamlar qeyd olunub:
- Azərbaycan ilə Ermənistan arasında sülh müqaviləsinin bağlanmasına fəal hazırlığın vacibliyi;
- Rusiya sülhməramlı kontingentinin təhlükəsizliyin təmin edilməsi, regionda vəziyyətin sabitləşdirilməsi istiqamətində fəaliyyətinin aktuallığı;
- Rusiyanın yardımı ilə ictimaiyyət nümayəndələri, ekspertlər və dini liderlər arasında dialoqun davam etdirilməsi üçün müsbət atmosferin yaradılması;
- Azərbaycan və Ermənistan xalqları arasında etimadı gücləndirmək üçün üçtərəfli parlamentlərarası təmasların başlanmasının vacibliyi.
Üçtərəfli toplantıdan sonra jurnalistlərə açıqlama verən Rusiya prezidenti Vladimir Putin görüşün çox faydalı olduğunu, Ermənistan və Azərbaycanın gələcəklə bağlı razılığa gəlmək bacarığı nümayiş etdirdiyini deyib:
Bugünkü müzakirə onu deməyə əsas verir ki, biz həm də bütün ölkələrimizin gələcəyi ilə bağlı danışıqlar apara bilərik. Bütün ölkələrimiz deyəndə mən Rusiyanı, Azərbaycanı, Ermənistanı, regionun bütün dövlətlərini nəzərdə tuturam. Çünki burada yaşayan bütün xalqlar münasibətlərin normallaşmasında maraqlıdırlar.
Putin
Rusiya lideri onu da vurğulayıb ki, Ermənistan və Azərbaycan arasında yekun nizamlanmaya nail olmaq üçün Rusiya hər şeyi edəcək.
