Azərbaycan Dövlət Təhlükəsizlik Xidməti İran xüsusi xidmət orqanlarının nəzarəti altında olan qanunsuz silahlı birləşmənin üzvlərini saxladığı haqda məlumat yayıb. DTX-nin rəsmi saytında qeyd edilib ki, qruplaşma üzvü olan Azərbaycan vətəndaşları İranın xüsusi xidmət orqanları tərəfindən ölkədən kənarda hərbi təlimlərə cəlb olunub və maliyyələşdiriliblər.
Nə iddia edilir: DTX-nın açıqlamasına görə, qruplaşma üzvləri “Müsəlman Birliyi” hərəkatının üzvləri arasından seçilib:
Onlar 3-cü ölkələrin ərazisindən keçirilməklə Tehran şəhərinə yollanıblar, orada mobil telefon və pasportları götürülməklə, dini ləqəblər verildikdən sonra saxta sənədlərlə hərbi yük təyyarələrində Suriyanın Dəməşq şəhərinə aparılıblar. Həmin şəxslər Suriyada hərbi təlimlərə cəlb olunub və buna görə müxtəlif məbləğlərdə pul vəsaitləri alıblar.
DTX məlumatında qeyd edir.
Qurum bildirir ki, bu hərbi təlimlərdə iştirak edən 19 nəfər Azərbaycan vətəndaşı istintaqa cəlb olunub, təlimlər barədə barədə sübutlar, Azərbaycanda yayılması qadağan olan dini kitablar və videomateriallar götürülüb.
Kimlərin adı hallanır: Cinayət işi üzrə İskəndər Hüseynov, Tural Haqverdiyev, Eltun Şükürov Eltun və digərləri Cinayət Məcəlləsinin 12.1, 279.1-ci (qanunvericiliklə nəzərdə tutulmayan silahlı birləşmələrdə iştirak etmə) maddələri ilə cinayət məsuliyyətinə cəlb edilərək saxlanılıb. Orxan Əsədov qruplaşma üzvlərini hərbi təlimlərə cəlb etməkdə ittiham olunur və rəsmi məlumata görə, o, 3-cü ölkə ərazisində həbs olunub.
DTX-nın yaydığı rəsmi məlumatda həm də İranın Azərbaycandakı səfirliyi ittiham olunur. Bildirilir ki, hərbi təlimlərdə iştirak edən Fəqan Məmmədov üzərində dini şüarlar yazılan köynəkləri ölkənin bəzi rayonlarında keçirilməsi planlaşdırılan aksiyaların iştirakçılarına paylayıb. Onun həmin köynəkləri səfirliyə məxsus maşınla Azərbaycana gətirdiyi iddia edilir.
Məlumatda daha nələr deyilir: DTX-nın açıqlamasına görə, birləşməyə rəhbərlik hazırda İranda olan Tohid İbrahimbəyli, Rövşən Əsədov, Orxan Məmmədov, Elşad Hacıyev və digərlərinə həvalə edilib. Adıçəkilən şəxslər barəsində 2018-ci ildə həbs qətimkan tədbiri seçilib və beynəlxalq axtarışa veriliblər.
