Balkan ölkələri vasitəsilə Rusiyadan Avropaya mühacirət etmək istəyən 50-dən çox çeçen Xorvatiyanın paytaxtı Zaqrebdə istintaq təcridxanasında saxlanılıb. OC Media yazır ki, Avropadakı çeçenlərin Assambleyası fiziki və psixoloji təzyiqə məruz qalan həmin şəxslərin ekstremist fəaliyyətdə iştirakda şübhəli bilindikləri üçün saxlanıldığını bildirib.
Nə iddia edilir: Avropadakı Çeçenlər Assambleyası immiqrantların Rusiyadakı hərbi səfərbərlikdən qaçmağa cəhd etdiyini deyir. Assambleyanın insan hüquqları şöbəsinin rəhbəri İsa Daduyev OC Mediaya bildirib ki, saxlanılanlar Xorvatiyada sığınacaq hüququndan imtina etməyə məcbur edilib, qohumları və vəkilləri ilə əlaqə saxlamağa icazə verilməyib:
Onlara təzyiq göstərilib, döyülüblər. Yalnız prokurorluq və hüquq-mühafizə orqanlarının nümayəndələrindən biri bu düşərgəyə gəlib qaçqınlarla görüşəndən sonra onlara qarşı münasibət dəyişib. Bu halın nə qədər davam edəcəyini bilmirik.
deyə bildirib
Daduyev onu da əlavə edib ki, həmin şəxslərə hüquqi yardım göstərmələri üçün müraciət etdikləri vəkillərin çoxu bundan imtina ediblər:
Xorvatiyadakı bəzi hüquqşünaslar kömək etməyə razılaşsalar da, ekstremizmlə bağlı ittiham olduğunu eşidən kimi geri çəkildilər. Onlar ya bu işi götürmək istəmirlər, ya da nəinki milli, həm də dini zəmində nifrət edirlər.
bildirib OC Mediaya
Assambleya rəsmisi bu həbslərin qeyri-qanuni olduğunu vurğulayıb, saxlanılan çeçen mühacirlərin azad edilməsini sürətləndirmək üçün Xorvatiya və Avropadakı insan haqları təşkilatlarına məktublar və müraciətlər hazırladıqlarını bildirib.
Saxlanılanlar haqda nə deyilir: Xorvatiyada sığınacaq axtaranlara dəstək göstərən Sülh Araşdırmaları Mərkəzi Xorvatiyanın Daxili İşlər Nazirliyindən sözügedən çeçenlər haqda məlumat tələb etsə də, cavab ala bilməyidiyini deyib. Daha sonra mərkəz bu məsələ ilə bağlı Xorvatiyanın Xalq Müdafiəçisini məlumatlandırıb. Onlar bununla bağlı aldıqları qeyri-rəsmi məlumatı bölüşüblər:
Saxlanılan çeçenlərdən 10 nəfərə yaxını sığınacaq axtaran şəxslərdir. Onlar daha əvvəl Zaqrebdəki Porin qəbul mərkəzində yerləşdiriliblər.
deyib Xalq Müdafiəçisinin nümayəndəsi
Bundan başqa, RFE/RL Xorvatiyada polis əməkdaşlarının fəaliyyətinə nəzarət edən Müstəqil Mexanizmin də bu məsələni müzakirə etməyi planlaşdırdığını qeyd edib. Mexanizmin koordinasiya komitəsinin sədri Robert Markt bildirib ki, hazırda Zaqrebdəki qəbul mərkəzində Rusiyadan olan 153 nəfər saxlanılır.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
