Sosial Tədqiqatlar Mərkəzi (STM) vergi borcu olan şirkətin bu qurumun tenderində qalib gəlməsi ilə bağlı Mikroskop Media-da yayımlanan infoqrafikaya cavab verib və şirkətin vergi borcu olmadığını deyib. İnfoqrafikada qeyd olunub ki, mərkəzin kreslo və stulların satın alınması ilə bağlı 2022-ci ildə keçirdiyi tenderdə Zaur Novruzov adlı şəxs qalib olub. Vergilər Nazirliyinin rəsmi saytında isə həmin şəxsin 10 130 manat borcunun olması barədə məlumat var.
STM-in mətbuat xidmətinin rəhbəri Əziz Əlibəyli Mikroskop Media-ya bildirib ki, sözügedən mal və avadanlıqların alınması zamanı Sosial Tədqiqatlar Mərkəzinə “Zaur Novruzov” adlı müəssisədən təqdim olunan rəsmi arayışlarda qurumun hər hansı vergi borcu olmayıb.
Sənədlər elektron sistemdə mövcuddur və onunla hər kəs tanış ola bilər. Əks halda, nə Mərkəz, nə də Antiinhisar və İstehlak bazarlarına Nəzarət idarəsi sözügedən əməliyyatın həyata keçirilməsinə yol verməsi mümkün deyil və qalib təşkilat bu hüquqdan məhrum olur.
STM bildirir ki, “Zaur Novruzov” adlı quruma aid vergi borcu tender prosesində iştirak etdiyi dövrdə olan yox, hazırkı borcdur.
Mərkəz sözügedən qurumla mal və avadanlıqların alınması çərçivəsində indiyədək, 68 min manatlıq ödənişləri həyata keçirib. İlin sonunadək həmin xərc maddəsinin, yəni, 182 minlik tender aktının 132 minə qədər hissəsinin yerinə yetirilməsi mümkün olacaq.
Əziz Əlibəyli bildirib.
STM Zaur Novruzovun vergi borcunun olmaması ilə bağlı sənədi də Mikroskop-a təqdim edib.
