Gürcüstanın qərbindəki Terjola bölgəsində qadın keçmiş əri tərəfindən yandırılaraq qətlə yetirilib. Bu, ölkədə son aylar ərzində baş verən səs-küylü qadın qətli və qadınlara qarşı zorakılıq hallarının sonuncusudur.
Media nə yazıb: TV Mtvarinin məlumatına görə, hadisə noyabrın 24-də gecə saatlarında, qadının menecer kimi çalışdığı supermarketdə baş verib. Kişi keçmiş həyat yoldaşının üzərinə benzin tökərək yandırıb, daha sonra otaqda bağlayaraq öldürüb. Hücum zamanı marketin bir neçə işçisi xəsarət alıb, hadisəni törədən şəxs isə ağır xəsarətlərlə xəstəxanada süni nəfəs aparatına qoşulub.
Rəsmi açıqlamada nə deyilir: Daxili İşlər Nazirliyindən OC Mediaya bildirilib ki, artıq xüsusi amansızlıqla qəsdən adam öldürmə maddəsilə istintaq başlayıb. Qeyd olunub ki, ittiham olunan şəxsi 16 ildən 20 ilədək və ya ömürlük azadlıqdan məhrum etmə cəzası gözləyir.
Qadın qətlləri ilə bağlı vəziyyət necədir: Gürcüstanda oktyabrın əvvəlində təkcə bir həftə ərzində üç qadın öldürülüb. Parlamentin spikeri Şalva Papuaşvili bu qətllər barədə danışarkən 2005-ci ildən bəri qadın cinayətlərinin sayının azaldığını deyib, lakin 1 həftədə 3 qətlin baş verməsini “dəhşətli fakt” adlandırıb.
Ölkə prokurorluğunun statistikasına görə, 2014-2022-ci illər ərzində 186 qadın qətli qeydə alınıb. Lakin qadın hüquqlarını müdafiə edən “Sapari” təşkilatının rəhbəri Baya Pataraya bunun əksini deyir. O, OC Media-ya bildirib ki, Gürcüstanda son illərdə qadın cinayətlərinin sayı artıb:
Əvvəllər vəziyyət belə deyildi. Daxili işlər naziri Georgi Qaxaria , müavini Natia Mezvrişvili olanda cinayətə görə mühakimə siyasəti çox sərt idi və qadın qətli xeyli azalmışdı. İndi isə biz keçmişdəki çox yüksək rəqəmlərə qayıdırıq.
o bildirib
Gürcüstanın İnsan Hüquqları üzrə Tərəfdaşlıq Qrupunun (PHR) hüquqşünası Ana Tavxelidzenin sözlərinə görə, əvvəllər dövlətin məişət zorakılığı ilə bağlı çox sərt siyasəti olub və məhkəmələrdə də öz əksini tapıb:
Azadlıqdan məhrum etmə cəzası tətbiq edilirdi və işə zərərçəkmiş şəxsin nöqteyi-nəzərindən baxılırdı. Lakin indi məhkəmələr öz təcrübələrini dəyişməyə başlayıblar və daha güclü sübut tələb edirlər. Bu, isə milli və beynəlxalq hüquqa ziddir. Məhkəmə son dərəcə yüksək standart sübut tələb edə bilməz, çünki bu cinayətin əsas xüsusiyyəti onun bağlı qapılar arxasında baş verməsidir. Əsas sübut zərərçəkmişin ifadəsi olmalı, məhkəmə bunu rəhbər tutmalıdır.
deyə qeyd edib
Tavxelidzenin fikrincə, “kifayət qədər sübut olmadığı üçün” məişət zorakılığı törədən kişilərə bəraət verilməsi onları cinayətə sövq edə bilər.
Hökumət hansı addımı atıb: Noyabrın 25-də hökumət qadınlara qarşı zorakılıqla bağlı 16 günlük beynəlxalq kampaniyada iştirak edəcəyini bəyan edib. Açıqlamada bildirilib ki, onlar “qadınlara qarşı zorakılıq və məişət zorakılığı ilə mübarizəyə koordinasiyalı və kompleks yanaşma” öhdəliyi götürürlər.
Ana Tavxelidze problemi həll etmək üçün ədliyyə sistemində düzəlişlərə ehtiyac olduğunu və mövcud vasitələrdən düzgün istifadə etməyin vacibliyini vurğulayıb:
İttiham olunan şəxsə verilən həbs qətimkan tədbiri cəzası çox vaxt səhv işləyir, ona nəzarət mexanizmi yararsızdır. Bu mexanizmə yenidən baxmaq lazımdır.
deyib
Baya Pataraya isə əlavə edib ki, bəzi hallarda polis məişət zorakılığı törədən şəxsi dindirdikdən sonra sərbəst buraxıb və ittiham olunan şəxs qadını qətlə yetirib:
Ümumiyyətlə, cinayətkarın davranışını proqnozlaşdırmaq çətindir. Ancaq zərərçəkmişlə sorğu-suala aparıldıqdan sonra risklərin qiymətləndirilməsi anketi var və bu,doldurulmalıdır. Lakin əsas problem polisin anketi ciddi qəbul etməməsi və onu doldurmağa tənbəllik etməsidir.
qeyd edib
Pataraya vurğulayıb ki, elektron bilərziklərdən istifadə edilən ölkələrdə qadın qətlləri demək olar ki, baş vermir. Gürcüstanda bu elektron bilərziklər olsa da, lakin onlardan az istifadə olunur.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
