Gürcüstanda kuir və qadınların hüquqlarını, eləcə də ətraf mühitin mühafizəsini təbliğ etməyi vəd edən Gürcü Yaşılları Partiyası fəaliyyətə başlayıb. OC Medianın məlumatına görə, Mtkvarze gecə klubunda keçirilən açılış mərasimində yüzlərlə tərəfdar iştirak edib. Partiyanın liderlərindən və təsisçilərindən biri olan Tornike Kuziani artıq 400-ə yaxın üzvün qeydiyyatdan keçdiyini bildirib.
Hədəf nədir: Partiyanın qurucularından olan 27 yaşlı Tamar Cakeli 1990-cı ildə yaradılan “Gürcüstan Yaşılları” hərəkatı ilə heç bir əlaqələri olmadığını, tamamilə müstəqil sol mərkəzli partiya olduqlarını bildirib. Cakelinin sözlərinə görə, əsas məqsədləri 2 yöndə mühüm məsələləri gündəmə gətirməkdir:
- ekologiya, iqlim, ətraf mühitin mühafizəsi;
- bərabərlik məsələləri;
- etnik və dini azlıqların hüquqları;
- kuirlərin, qadınların, fiziki məhdudiyyətli şəxslərin hüquqları;
- sosial təminatı az olan insanların hüquqlarının qorunması.
Cakeli onu da qeyd edib ki, ictimai fəallar və vətəndaş cəmiyyəti təşkilatları ilə məsləhətləşənə qədər konkret siyasi bəyanatlar verməməyə çalışacaqlar:
Əgər parlamentdə yer alsaq, hansı siyasəti izləyəcəyimizi müəyyən etmək üçün müntəzəm görüşlər və ardıcıl proses vasitəsilə konkret məqamlar üzərində işləmək istəyirik.
qeyd edib
Bundan başqa, partiya liderləri hakimiyyətə gələcəkləri halda Gürcüstanda sistemli dəyişikliklər etməyi planlaşdırdıqlarını bildiriblər. Partiyanın təsisçilərindən olan Tornike Kuzianinin fikrincə, son bir neçə ildir ölkədə vətəndaş fəallığının ənənəvi formaları ümumiyyətlə fəaliyyətini dayandırıb:
Çünki insan bir ay parlamentin qarşısında çadır qura bilər, amma yenə də hakimiyyət tərəfindən ona məhəl qoyulmur. Başa düşdük ki, sistemlə xaricdən mübarizə aparmaqla yanaşı, daxildən də mübarizə aparmaq lazımdır.
deyə bildirib
Kuzianın sözlərinə görə, onlar ictimaiyyətin rəğbətini qazanmaq üçün dəyərlərindən güzəştə getməyəcəklər və hüquqları pozulan bütün şəxslər üçün platforma yaratmaq istəyirlər.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
