Bu il 13-14 sentyabrda Azərbaycan-Ermənistan sərhədində baş verən toqquşmalar zamanı 7600-ə yaxın erməni evini tərk edib. Sakinlərin əksəriyyəti daha sonra geri qayıtsa da, sərhəddə vəziyyətin daha da gərginləşəcəyindən qorxurlar.
OC Media yazır ki, atışma nəticəsində yaşayış məntəqələrini birləşdirən yollar demək olar ki, sıradan çıxıb, bütün sərhədyanı erməni yaşayış məntəqələrindən ən çox Qeqarkunik vilayətindəki Sotk kəndi zərər çəkib. Orada 60-a yaxın ev dağılıb, 117-si ziyan görüb.
İnsident günü necə xatırlanır: Sərhəddə atışmalar zamanı evlər atəş altında qalsa da, bəzi sakinlər evlərini tərk etmək istəməyiblər. 82 yaşlı Qreta Melkumyan Sotkda dağılan evindən çıxmayıb, sentyabr toqquşmalarından sonra bir neçə həftə maşında yatmalı olub:
Gecə bərk yatmışdım, gəlinim məni oyadıb getməli olduğumuzu dedi. Dedi ki, getməliyik. Bu, müharibədir.
OC Mediaya müsahibəsində deyir
Qreta da bir çoxu kimi sabitliyə və uzunmüddətli atəşkəsə ümid edir:
Artıq maşında yatmıram, amma hələ də yata bilmirəm. Hər gün müharibənin yenidən başlayacağından qorxuram. Çox şey istəmirəm: xalqımız üçün yalnız sülh.
bildirir
82 yaşlı qadın onu da əlavə edib ki, onlara Martunidə ev təklif edilsə də, kəndi, şəxsi fermasını tərk etmək istəməyiblər. Melkumyanın sözlərinə görə, bu yaxınlarda fransız hüquqşünaslar Sotka baş çəkərək atəş nəticəsində dəymiş ziyanı sənədləşdiriblər.
Sotk kəndinin rəhbəri Sevak Xaçatryanın 13-14 sentyabrda baş verənləri xatırlayarkən ilk zərbənin saat 00:05-də olduğunu, bundan sonra davamlı olaraq atışmalar başladığını deyir:
Sentyabrın 13-nə keçən gecə kənd sakinləri kütləvi şəkildə evlərini tərk etməyə başladılar. Kənddəki 900 sakindən çoxu səhərə qədər Sotkdan təxliyə edilib.
deyir jurnalistə
Xaçatryanın sözlərinə görə, atışmalardan 3 ay sonra səlahiyyətlilər kəndi zibillərdən təmizləyiblər və yenidənqurma işləri davam edir. O, kənddən çıxanların böyük qisminin geri qayıtdığını, kənd təsərrüfatı ilə məşğul olduqlarını bildirib.
Hökumət necə yardım göstərib: Azərbaycanla həmsərhəd olan şərq əyalətlərindəki şəhər və kəndlərə geri qayıdan insanlara Ermənistanın Əmək və Əhalinin Sosial Müdafiəsi Nazirliyi kömək göstərib. Belə ki, nazirliyin yaratdığı Əsas Ehtiyacların İnventarlaşdırılması Platforması vasitəsilə sakinlər qida, geyim, dərman və ya ehtiyacı olan digər xidmətlərlə bağlı yazıblar. Onların ərizləri regional administrasiyalara və yerli hakimiyyət orqanlarına ötürülüb və ehtiyacları təmin olunub.
Bundan başqa, nazirlik ayrı-ayrı şəxslər və təşkilatların təklif etdiyi resursları inventarlaşdırmaq, Qırmızı Xaç Cəmiyyəti ilə əməkdaşlıq edərək döyüşlərdən zərər çəkənlərə humanitar yardım göstərmək üçün ayrıca platforma işə salıb.
Zərər barədə nə deyilir: Sentyabrın 13-14-də baş verən toqquşmalarda təxminən 40 yaşayış məntəqəsi Azərbaycan tərəfindən atəşə tutulub. Rəsmi açıqlamalara görə, sərhəddə 192 yaşayış binası, 3 otel, 2 məktəb və 1 tibb məntəqəsi qismən və ya tamamilə dağılıb.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
