ABŞ Mərkəzi Kəşfiyyat İdarəsinin rəhbəri Uilyam Berns yanvar ayında Kiyev və Moskvaya səfər edib və Ukrayna-Rusiya arasındakı münaqişənin nizamlanma ehtimalı barədə danışıqlar aparıb. Bu barədə Meduza İsveçrənin “Neue Zurcher Zeitung” qəzetinə istinadən məlumat yayıb.
Məlumatda deyilir ki, ABŞ rəsmisinin səfəri yanvarın ortasında prezident Co Baydenin Uilyam Bernsə iki ölkənin sülhə nə qədər hazır olduğunu müəyyənləşdirmək barədə tapşırığından sonra baş tutub. Rəsmi Kiyev və Moskvanın reaksiyaları isə Ukraynaya ABŞ və Almaniya tanklarının verilməsi ilə nəticələnib.
Almaniyanın yüksək rütbəli 2 məmuruna istinad edən “Neue Zurcher Zeitung” yazır ki, Uilyam Berns Kiyevə “sülh qarşılığında torpaq”, Moskvaya isə “torpaq qarşılığında sülh” təklifi ilə gedib. Söhbət Ukrayna ərazisinin 20%-nin Rusiyaya verilməsi qarşılığında sülhün əldə olunmasından gedir.
Hər iki tərəf bu təklifi rədd edib. Ukrayna tərəfi ərazi itkisini qəbul etmədiyini, Rusiya isə uzaq gələcəkdə müharibədə qalib gələcəyini deyib.
Qəzetin istinad etdiyi mənbələr danışıqların uğursuz olması nəticəsində ABŞ-ın Ukraynaya Abrams, Almaniyanın isə Leopard tanklarının verildiyini iddia edir.
Mərkəzi Kəşfiyyat İdarəsinin adı açıqlanmayan əməkdaşı isə “Newsweek”ə açıqlamasında İsveçrə qəzetinin yazdığı xəbərin tamamilə yalan olduğunu deyib.
Bernsin yanvar ayında Kiyevə getməsi ilə bağlı məlumatı bundan əvvəl “The Washington Post” yazıb. Qəzetin xəbərinə görə, Berns Zelinskini “Rusiyanın yaxın həftə və aylardakı hərbi planları barədə məlumatlandırmaq” üçün Kiyevə səfər edib.
