Münhen Təhlükəsizlik Konfransı çərçivəsində 18 fevralda keçirilən panel müzakirənin canlı yayımı Azərbaycan Dövlət Televiziyası və İctimai Tv-də yarımçıq kəsilib. Yayım Ermənistanın Baş naziri Nikol Paşinyan ölkəsindəki seçkilərin demokratik keçirilməsi ilə bağlı danışarkən dayanıb.
AzTV bunu konfrans təşkilatçılarının yayımı kəsməsi ilə əsaslandırıb. Mikroskop Media həm konfrans təşkilatçılarından bu barədə soruşub, həm də qonşu ölkələrdəki yayımlarda kəsintinin olub-olmadığını araşdırıb.
Almaniyanın Münhen şəhərində hər il keçirilən Münhen Təhlükəsizlik Konfransında bu il də Azərbaycan prezidenti İlham Əliyev iştirak edib və fevralın 18-də keçirilən “Dağları aşmaq? Cənubi Qafqazda təhlükəsizliyin qurulması” adlı panel müzakirəyə qoşulub. Həmin müzakirədə Ermənistanın Baş naziri Nikol Paşinyan və Gürcüstanın Baş naziri İrakli Qaribaşvili də suallara cavab verib.
Görüşdə moderator, Münhen Təhlükəsizlik Konfrasının rəhbəri Kristof Hoysgen iştirakçılara suallar ünvanlayıb və onlar növbə ilə cavab veriblər. Ən sonda jurnalistlərə imkan verilib ki, sual versinlər, amma panel müzakirəyə ayrılan vaxt çərçivəsində yalnız bir jurnalist – GlobSec Kiyev bürosundan Yuliya Osmolovskaya sual verə bilib. O sual isə hər 3 ölkə rəhbərinə ünvanlanıb və onlar da növbə ilə cavablarını səsləndiriblər.
Konfransın panel müzakirəsi canlı yayımlanıb və bu yayımı Azərbaycan televiziyaları, AzTV və İctimai TV də yayımlayıb. Lakin yayım Ermənistan Baş naziri Nikol Paşinyan müharibədən sonra ölkəsindəki seçkilərdən və bu seçkilərin demokratik və azad rəqabət mühitində keçməsi barədə danışarkən kəsilib. Eləcə də Azərbaycan prezidentinin rəsmi YouTube kanalında yayım eyni yerdə dayandırılıb.
Paşinyanın çıxışının Azərbaycan televiziyalarında kəsildiyi hissə:
Fəxr edirəm ki, bizim hökumətimiz hətta dəhşətli müharibədən sonra ölkəmizdə azad demokratik seçkilər keçirdi. Həmin seçki bütün dünya tərəfindən azad, şəffaf, demokratik seçki kimi tanındı. Bizim mövqeyimiz odur ki, həll yolu demokratiyadır. Həll yolu şəffaflıqdır…
Yayım efirdə dayandırıldıqdan qısa müddət sonra Azərbaycan Dövlət Televiziyasının yaydığı rəsmi açıqlamada bildirilib ki, kəsintiyə səbəb konfrans təşkilatçıları olub, yəni yayımı onlar dayandırıb.
Bəs əslində nə baş verib?
Konfransın yayımı onun rəsmi saytı ilə yanaşı bir neçə sosial şəbəkədə baş tutub. Eləcə də Azərbaycanla yanaşı Ermənistan və Gürcüstanda da həmin panel müzakirə canlı yayımlanıb.
Münhen Təhlükəsizlik Konfransının rəsmi Facebook səhifəsində yayım müzakirənin sonuna qədər davam edib.
Konfransın Twitter sosial şəbəkəsindən etdiyi canlı yayımda kəsinti olub və bu da Paşinyanın çıxışına təsadüf edib. Lakin kəsintinin olduğu konkret hissə Azərbaycan mediasındakından fərqlidir. Burada kəsinti olan cümlə:
Yeri gəlmişkən bizim ölkədə müsəlman icması yaşayır, məscid fəaliyyət göstərir və bu reallıqdır. Azərbaycan tərəfi demək olar ki, təhqiramis olan kapitulyasiya kimi sözlər istifadə edir. Elə təəssürat yaranır ki, Azərbaycan qisas siyasəti qəbul edib.
Paşinyanın nitqinin demokratik seçki barədə olan hissəsi isə yuxarıdakı cümlədən 1 dəqiqə 30 saniyə sonra səslənir. Yəni, təşkilatçıların təkcə Twitterdəki yayımı kəsiləndə ümumiyyətlə AzTV-də kəsinti olan hissədəki cümlələr səsləndirilməmişdi.
Ermənistandakı yayım
Ermənistanın da bir neçə mediası tədbiri canlı yayımlayıb və onların da bir qismində kəstinti olub, amma panel müzakirənin fərqli hissələrində. Həmin yayımların bir qismi:
Azadlıq Radiosunun Ermənistan bürosunda yayım panel müzakirənin sonuna qədər davam edib.
Ermənistanın digər bir mediası Factor TV-nin YouTube kanalında isə yayım ukraynalı jurnalistin iştirakçılara sual ünvanladığı hissəyə qədər efirə verilib. Bu zaman artıq Paşinyan nitqini tamamlamışdı.
Armenia Today-in canlı yayımında da efir ukraynalı jurnalistin sual verməyə başladığı hissədə dayandırılıb.
1in.am isə yayımı ukraynalı jurnalistin sualına Paşinyan və Qaribaşvili cavab verəndən sonra dayandırıb.
Gürcüstandakı yayım
Gürcüstanda bu tədbirin canlı yayımını təkcə medialar yox, eləcə də hökumətin və baş nazirin rəsmi Facebook səhifələri həyata keçirib.
Gürcüstan İctimai Televiziyasının yayımı sona qədər davam edib və kəsinti olmayıb.
Gürcüstan Baş naziri İrakli Qaribaşvilinin rəsmi Facebook səhifəsində gürcü dilinə birbaşa tərcümə ilə görüş canlı yayımlanıb. Buradakı yayım isə ukraynalı jurnalistin sualını səsləndirdikdən sonra kəsilib.
Gürcüstan Hökumətinin rəsmi Facebook səhifəsi isə yayımı ölkə rəhbərlərinin jurnalistin suallarına cavab verməyə başladığı anda dayandırıb.
Təşkilatçılar nə deyir?
Mikroskop Media baş verən kəsinti ilə əlaqədar olaraq Münhen Təhlükəsizlik Konfransının mətbuat xidmətinə sorğu göndərib. Sorğuya cavab olaraq bildirilib ki, müzakirə gec başladığından rəsmi saytda yayımla bağlı texniki problemlər yaranmış ola bilər. AzTV-dəki yayımın kəsilməsi ilə bağlı suala cavabda isə bildirilib:
Ehtimal edirik ki, AzTV yayımı saytımızdan götürüb, amma bunu təsdiq edə bilmərik.
Nəticə etibarilə müxtəlif medialardakı yayım müzakirənin müxtəlif hissələrində kəsilib, yalnız AzTV, İTV və Azərbaycan prezidentinin rəsmi YouTube kanalında yayım Paşinyanın demokratiya barədə danışdığı hissədə dayandırılıb.
