Rusiya Amerika Birləşmiş Ştatları ilə olan Strateji Hücum Silahları Haqqında (START) Müqavilədə iştirakını dayandırdığını bəyan edib. Bunu ölkə prezidenti Vladimir Putin Federal Məclisə müraciəti zamanı açıqlayıb. Çıxışı zamanı Putin bildirib ki, 2012-ci ildə Rusiyanın xarici siyasəti ilə bağlı imzaladığı fərmanı ləğv edib və qərar bu gündən qüvvəyə minib.
Qərarda nə deyilir: Putinin bu gün imzaladığı fərman Hüquqi İnformasiya rəsmi portalında dərc olunub. Rəsmi sənəddə qeyd olunub ki, prezidentin bu qərarı beynəlxalq münasibətlərdə baş verən mühüm dəyişikliklər qarşısında Rusiyanın maraqlarını müdafiə etmək məqsədi daşıyır.
“Meduza” yazır ki, 2012-ci ildə imzalanmış fərmanda, xüsusilə ABŞ-la Strateji Silahların Məhdudlaşdırılması Müqaviləsinin (START) “ardıcıl şəkildə həyata keçirilməsi” nəzərdə tutulurdu.
START müqaviləsi nədir: Rusiya və ABŞ arasında strateji hücum silahlarına dair imzalanan müqavilə hər iki tərəfdəki nüvə başlıqlarının sayını 1550, qitələrarası ballistik raketlərin, sualtı qayıqlardakı ballistik raketlərin və ağır bombardmançı təyyarələrin sayını 700-ə qədər məhdudlaşdırır. Saziş 2010-cu ildə Barak Obama və Dmitri Medvedev tərəfindən imzalanıb və 2021-ci ildə tərəflər müqavilənin müddətini 2026-cı il fevralın 5-dək uzadıb.
Putin müqaviləni dayandırmaq haqda nə deyib: Federal Məclis, Duma deputatları və digər dövlət rəsmiləri qarşısında çıxış edən Putin sazişdən çıxmadıqlarını, sadəcə iştirakı dayandırdıqlarını vurğulayıb. O, həm də iddia edib ki, ABŞ hazırda nüvə silahlarının yeni növlərini hazırlayır və Rusiya nüvə sınaqları keçirməyə hazır olmalıdır:
Əgər ABŞ sınaqlar keçirsə, biz də edəcəyik. Heç kim qlobal strateji paritetin məhv edilə biləcəyi illüziyasına qapılmamalıdır.
deyib
Meduza-nın yaydığı məlumata görə, 11 il əvvəl imzalanmış fərman Rusiyanın Avropa İttifaqı və ABŞ-a yaxınlaşacağını, Moldovanın suverenliyinə və bütün ölkələrin ərazi bütövlüyünə hörmət edəcəyini nəzərdə tuturdu. Lakin bu gün, “2012-c il fərmanının ləğvi ilə bağlı” qərar Rusiyanın xarici siyasətinin 2012-ci ildə müəyyən edilmiş bəzi müddəalarını ləğv edir. Ləğv edilən tələblərin bir qismi aşağıdakılardır:
- Rusiya Federasiyasının uzunmüddətli inkişafı üçün əlverişli xarici şəraitin yaradılması;
- NATO ilə Rusiya Federasiyası arasında münasibətləri mütənasib şəkildə inkişaf etdirmək;
- BMT Nizamnaməsinin “dövlətlər arasında dostluq əlaqələrində bərabərlik, onların suverenliyinə və ərazi bütövlüyünə hörmət əsasında dostluq münasibətlərinin inkişaf etdirilməsi”ni tələb edən fundemantal prinsipi dəstəkləmək ;
- Moldovanın suverenliyinə, ərazi bütövlüyünə və bitərəf statusuna hörmət əsasında Dnestryanı probleminin həlli yollarını fəal şəkildə axtarmağa davam etmək;
- İttifaq dövləti çərçivəsində Belarusla əməkdaşlığı aktiv şəkildə genişləndirməyə davam etmək;
- Qismən tanınan Abxaziyanın və Cənubi Osetiyanın müasir demokratik dövlətlər kimi formalaşmasına fəal yardım etmək;
- ABŞ-la münasibətlərdə bərabərlik, daxili işlərə qarışmamaq, sabit və qarşılıqlı əlaqəni saxlamaq, həmçinin viza rejiminin daha da liberallaşdırılması ilə bağlı təşəbbüsləri dəstəkləmək;
- Çinlə bərabərhüquqlu və etibarlı tərəfdaşlığı, strateji əməkdaşlığı, Hindistan və Vyetnamla strateji tərəfdaşlığı dərinləşdirmək. Yaponiya, Koreya, Avstraliya, Yeni Zelandiya ilə qarşılıqlı faydalı əməkdaşlığı inkişaf etdirmək.
