Rusiyanın Xarici İşlər Nazirliyi Avropa İttifaqını Ermənistana monitorinq missiyası göndərdiyinə görə tənqid edib. OC Media-nın məlumatına görə, bazar ertəsi, Avropa İttifaqının Ermənistanda 2 illik mülki monitorinq missiyasını yerləşdirdiyi gün Rusiya XİN-nin sözçüsü Mariya Zaxarova bəyanat yayaraq Aİ-ni Ermənistanda möhkəmlənmək cəhdində ittiham edib:
Birinci dəfə deyil ki, biz Avropa İttifaqının müttəfiq Ermənistanda möhkəmlənmək üçün səylər göstərdiyini görürük. Bu cəhdlərin arxasında Cənubi Qafqazda münasibətlərin normallaşdırılması maraqlarından uzaq, yalnız siyasi motivlər görürük.
deyib bəyanatında
XİN rəsmisi əlavə edib ki, Bakının missiyaya olan “mənfi münasibəti”nə də məhəl qoyulmayıb.
İlk missiya nə vaxt göndərilib: 2022-ci ilin sentyabrında Azərbaycan-Ermənistan sərhədində toqquşmalar baş verdikdən sonra 6 oktyabrda Azərbaycan, Ermənistan, Fransa liderləri və Aİ Şurasının sədri Praqa görüşündə Ermənistana missiya göndərilməsi haqda razılığa gəliblər. Bundan sonra 40-a qədər Aİ eksperti Ermənistan sərhədinə göndərilib və fəaliyyəti 2 ay davam edib.
Yeni missiya nə zaman yaradılıb: 2023-cü il yanvarın 23-də Aİ Şurası Ümumi Təhlükəsizlik və Müdafiə Siyasəti çərçivəsində Ermənistanda Aİ-nin 2 illik mülki missiyasının yaradılmasına razılıq verib. Fevralın 20-də fəaliyətə başlayan missiyanın tərkibində 50-yə yaxın ekspert və avropalı müşahidəçilər də daxil olmaqla 100-ə yaxın şəxs olacaq. İndiyədək Almaniya, Fransa, Litva və Hollandiya missiyada iştirak edəcəklərini açıqlayıblar.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
