Beynəlxalq Ədalət Məhkəməsi Azərbaycan və Ermənistanın bir-birinə qarşı iddiaları ilə bağlı qərar qəbul edib. OC Medianın məlumatına görə, məhkəmə tərəflərin iddialarını ləğv edib, eyni zamanda Azərbayacana qarşı tələb irəli sürüb.
Azərbaycandan nə tələb olunur: Məhkəmə Laçın dəhlizini yenidən açmağı tələb edərək bildirilib ki, Azərbaycan hər iki istiqamətdə insanların, nəqliyyat vasitələrinin, yüklərin maneəsiz hərəkətini təmin etmək üçün bütün tədbirləri görməlidir. Bundan başqa, Məhkəmənin qərarında qeyd olunub ki, verdikləri müvəqqəti sərəncam “məcburi qüvvəyə malikdir” və hər iki tərəf üçün beynəlxalq hüquqi öhdəliklər yaradır.
Hansı iddialar rədd olunub: Ermənistan Ədalət Məhkəməsindən “Laçın dəhlizinin bağlanması, həm də Azərbaycanın dəhlizi bağlayan fəalları dəstəkləməsi, Dağlıq Qarabağın qaz təchizatını dayandırması” ilə bağlı qərar verilməsini tələb edib. Beynəlxalq məhkəmə bu iddiaları rədd edib.
Azərbaycan tərəfi isə Ermənistandan “Azərbaycan ərazilərini minalamağı dayandırmağı və əvvəlki illərdə basdırılan minaların yerini bildirməyi” tələb etmişdi. Məhkəmə bu iddianın tələblərə uyğun olmadığını bildirərək vəsatəti təmin etməyib.
Qərarlara nə reaksiya verilib: Rəsmi Yerevan Beynəlxalq Məhkəmənin Laçın dəhlizi ilə bağlı tələbini alqışlayaraq gedişatı “yaxından izləyəcəyini” deyib. XİN-dən bildirilib ki, Ermənistanın Azərbaycana qarşı işi davam etdiyi müddətdə Azərbaycan hər hansı pozuntulara yol verərsə, bu barədə məhkəməni məlumatlandıracaqlar.
Nazirlik həmçinin vurğulayıb ki, Azərbaycanın məhkəmə qərarını dərhal icra etməsi üçün beynəlxalq ictimaiyyət fəal addımlar atmalıdır.
Azərbaycanın Xarici İşlər Nazirliyi də dərhal qərara münasibət bildirib və Beynəlxalq məhkəmənin Ermənistanın tələbini rədd etməsini alqışlayıb. Məhkəmənin Azərbaycana qarşı tələbinə gəlincə, XİN açıqlamasında Laçın dəhlizində nəqliyyatın təhlükəsiz hərəkətini təmin etmək üçün Azərbaycanın öhdəliyinə düşən bütün tədbirləri gördüyünü, bundan sonra da görəcəyini bildirilib.
Laçın dəhlizində nə baş verir: Dağlıq Qarabağ ərazisindən mədən qazıntıları aparılmağa başlanandan sonra özünü ekofəal kimi təqdim edən bir qrup azərbaycanlı, QHT nümayəndələri dekabrın 12-də Laçın yolunu bağlayıblar. Bir sıra Qərb ölkələri və beynəlxalq insan haqları təşkilatları Azərbaycan və Rusiyanı dəhlizi yenidən açmağa çağırıblar.
Bakı isə Qırmızı Xaç və Rusiya sülhməramlılarının maşınlarının Dağlıq Qarabağa humanitar yardımların çatdırılmasına icazə verildiyini deyir və yolun bağlanmasının bölgədə ərzaq və dərman çatışmazlığı yaratdığını təkzib edir.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
