Ermənistan Rusiyanın rəhbərlik etdiyi Kollektiv Təhlükəsizlik Müqaviləsi Təşkilatının (KTMT) baş katibinin müavini vəzifəsinə nümayəndə göndərməkdən imtina edib. OC Media yazır ki, qərarı Ermənistanın Xarici İşlər Nazirliyi təsdiqləyib. Lakin müqavilə protokoluna əsasən, 2023-cü ildə baş katibin müavini vəzifəsini Ermənistan nümayəndəsi tutmalı idi.
Niyə bu addım atılıb: Qərar Azərbaycanla yaşanan son münaqişələrdə rəsmi Yerevanın Rusiyanın hərbi paktla bağlı fəaliyyət göstərməməsini dəfələrlə tənqid etməsindən sonra verilib. Belə ki, müqavilənin şərtlərinə əsasən, bir üzv dövlətə hücum hamıya hücum kimi qiymətləndirilməlidir. Lakin 2022-ci ilin sentyabrında Azərbaycanın Ermənistan ərazisinə hücumundan sonra təşkilat heç bir əməli yardım təklif etməyib. Yalnız faktdan sonra faktaraşdırıcı missiyanın göndərilməsi təklif edilib.
Gərginlik nə vaxt başlayıb: Müharibədən qısa müddət sonra baş nazir Nikol Paşinyan, o cümlədən Ermənistan hökumətinin yüksək vəzifəli şəxsləri, KTMT-nin fəaliyyətsizliyindən narazı olduqlarını bildirsələr də, paktdan çıxmağı istisna ediblər. Bu ilin əvvəlində isə Nikol Paşinyan aylansın planlaşdırılan hərbi təlimlərinin Ermənistanda keçirilməyəcəyini açıqladı. O, Ermənistanın hələ də Müqavilənin “məsuliyyət zonası”nın nədən ibarət olması ilə bağlı konkret cavablar gözlədiyini, lakin bir cavabının olmamasının əsas problem olduğunu qeyd etmişdi.
Növbəti gərginlik Avropa İttifaqının Ermənistana monitorinq missiyasını göndərəcəyini elan etməsindən sonra yaranıb. Aİ ilə yanaşı, KTMT də müşahidəçiləri göndərməyə hazır olduğunu açıqlayıb. Daha sonra isə Ermənistanı Aİ-yə “üstünlük verməkdə” ittiham edib. İrəvanda keçirilən etiraz aksiyalarında da KTMT-nin fəaliyyətinə qarşı tənqidlər özünü göstərmişdi. Noyabrda keçirilən mitinqdə etirazçılar Ermənistandan tələb edirdilər ki, erməni əsilli rusiyalı jurnalist Marqarita Simonyanın ölkəyə girişini qadağan etdikləri kimi” KTMT-yə də qadağa tətbiq etsinlər.
Ermənistan Rusiyadan niyə narazıdır: Laçın dəhlizinin blokadaya alınmasından sonrakı aylarda Rusiyadan narazılıq daha artıb. Belə ki, Rusiya sülhməramlı qüvvələrinin nəzarətində olan, Dağlıq Qarabağı Ermənistanla birləşdirən yeganə yol 2022-ci il dekabrın 12-dən azərbaycanlı etirazçılar tərəfindən bağlanıb. Sülhməramlılar dəhlizin blokadası ilə bağlı məsələləri Azərbaycanla müzakirə etdiklərini desələr də, heç bir ciddi nəticə əldə olunmayıb.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
