7-8 apreldə Azərbaycan və İran Xarici İşlər Nazirliyinin rəhbərləri arasında son günlərdə iki ölkə arasındakı gərginliyi müzakirə etmək məqsədilə ilə telefon danışığı olub. Hər iki ölkənin XİN mətbuat xidməti 2 dəfə baş tutan telefon danışığı ilə bağlı bir dəfə məlumat yayıb. Telefon danışığı ilə bağlı həm İran, həm də Azərbaycan tərəfi aprelin 8-i axşam saatlarında rəsmi məlumat yayıb, amma onların arasında fərqlər var.
Azərbaycan tərəfinin paylaşdığı:
- Tərəflərhər iki ölkənin ərazi bütövlüyünə və suverenliyinə hörmətlə yanaşdığını bildirib
- İki ölkə arasındakı narazılıqlar və anlaşılmazlıqlar müzakirə edilib
- Mövcud layihələrin icrası istiqamətində iş aparılmasına dair razılığa gəlinib
İran tərəfinin paylaşdığı:
- Narazılıqların və anlaşılmazlıqların aradan qaldırılması üçün çıxış yolları axtarılmasına qərar verilib
- İsrailin regiondakı fəaliyyəti nəticəsində yaranan mübahisələrdən qalib çıxanın yalnız düşmən olacağı qeyd olunub
- Hər iki xalqın maraqları naminə media mühitinə nəzarət olunmasının vacibliyi vurğulanıb
İki ölkə Xarici İşlər Nazirliyinin yadığı xəbərdə əsas məqamlardan biri media ilə bağlı hissədir. Həm Ceyhun Bayramov, həm də həmkarı Hüseyn Əmir Abdullahian iki ölkənin mediasına nəzarət etməkdə razılığa gəliblər.
Bu niyə problemdir: Həm Azərbaycanda, həm də İranda iki ölkə arasındakı münasibətlərin gərginləşməsi və ictimaiyyətin fikrini yönləndirmədə hökumətyönlü medialar ciddi rol oynayır. Azərbaycanda “bu işi öz üzərinə” yerli telekanallar götürüb və hmin telekanallarda mütəmadi olaraq İranı tənqid edən reportajlar yayımlanır, verilişlər hazırlanır.
Ceyhun Bayramovun ölkə medialarına nəzarət edilməsi məsələsində razılaşması televiziyaların bu günə qədər də yayımladığı reportajların hökumətin razılığı ilə yayımladığı mənasına gəlir.
Həmin medialar nəyi hansı başlıqla yayımlayır:
AZTV: Tehran rejimi terror şəbəkəsini belə qurur: maliyyələşdirməsi mexanizminin DETALLARI – 10 aprel 2023
İctimai Televiziya: İran Ermənistanla sərhədə ordu yığır | Azərbaycan nə etməlidir? – 9 aprel 2023
ARB 24: İranın Azərbaycanda çevriliş cəhdi: Məxfi adamlara 6 ay öncə əmr verilib – 9 aprel 2023
Real TV: Regionun narkobaronu – İran – 6 aprel 2023
Nə baş verib: Azərbaycan və İran arasında bir neçə həftədir davam edən gərginlik deputat Fazil Mustafanın evinin önündə güllələnməsindən sonra bir az da dərinləşib. Bu hadisədən sonra Azərbaycanda İrana “casus kimi işləməkdə” ittiham edilən yüzlərlə dindar həbs edilib. XİN rəhbərlərinin son danışığından bir gün əvvəl isə Azərbaycan İran səfirliyinin 4 əməkdaşını arzu olunmaz şəxs elan edib və onlardan 48 saat ərzində ölkəni tərk etməsini tələb edib.
