Azərbaycan Demokratiya və Rifah Partiyasının sədri, iqtisadçı Qubad İbadoğlu 23 iyulda saxlanılıb. Onun barəsində Cinayət Məcəlləsinin 204.1-ci – satış məqsədi ilə saxta pul, qiymətli dövlət kağızları əldə etmə və ya satma – maddəsi ilə cinayət işi başlanıb. Qubad İbadoğlu öz həbsi barədə qısa şərh verə bilib: “İlham Əliyevin sifarişilə saxlanılmışam”.
Niyə saxlanılıb?
Qubad İbadoğlu Anar Əliyev adlı şəxsin ifadəsi əsasında saxlanılıb. A. Əliyevin ifadəsinə görə Q. İbadoğlu ona saxta pul və hansısa təlimatlar verib. İfadə verən Anar Əliyev özü də saxlanılıb və onun ifadəsində haqqında danışdığı təlimatların nələr olduğu məlum deyil.
Saxlanılan digər şəxslər: Döyrüş Cəfərov, Gümrah Əbdürəhmanov və Ruslan Əliyevdir. Onların FETÖ ilə əlaqələrinin olduğu iddia edilir.
Türkiyənin həbsdəki rolu
Qubad İbadoğlunun həbsindən dərhal sonra Türkiyə hökumətinə yaxın medialarında “Azərbaycanda FETÖ əleyhinə əməliyyat” keçirildiyi və 5 nəfərin saxlanıldığı barədə xəbərlər yazılmağa başlandı. Həmin xəbərlərdə saxlanılanlardan birinin siyasi partiya rəhbəri olduğu qeyd edilirdi. Türkiyənin terror təşkilatı kimi tanıdığı FETÖ əleyhinə Azərbaycanda bundan əvvəl də əməliyyatlar olub.
Bununla yanaşı, Azərbaycan Daxili İşlər Nazirliyinin yaydığı rəsmi məlumata görə, bu dəfəki əməliyyat Türkiyə Daxili İşlər Nazirliyindən daxil olan məlumat əsasında keçirilib.
DİN-in rəsmi açıqlaması
23 iyulda gün ərzində bir neçə dəfə DİN rəsmi açıqlama verib.
Saxlanma barədə: DİN açıqlamasında saxlanma yox, dəvət edilmə kimi yazıb. Bildirilib ki, Qubad İbadoğlu vəkili Zibeydə Sadıqova ilə birgə Baş Mütəşəkkil Cinayətkarlıqla Mübarizə İdarəsinə dəvət edilib.
Həyat yoldaşının saxlanması barədə: DİN partiya sədrinin həyat yoldaşı ilə birgə saxlanmasını təkzib edib. İddiaları əsassız adlandırıb.
Ofisində axtarış
23 iyulda Qubad İbadoğlunun Bakıdakı ofisində axtarış aparılıb. Axtarış gecə saatlarınadək davam edib. Ofisindən sənədlər və 40 min ABŞ dolları “aşkarlanıb”. Bu pulun saxta olub-olmaması ilə bağlı ekspertiza keçiriləcək.
Səhhəti pisdir, dərman isə verilmir
Qubad İbadoğlunun qızı Jalə Bayramova atasının səhhətindən narahatdır. O yazır ki, “atasının yüksək təzyiq və şəkəri var, dərmanlar onun həm də digər daxili orqanları üçündür. Həmin dərmanlarsız o sadəcə məhv ola bilər”.
Q. İbadoğlunun həyat yoldaşına zorakılıq
Qızı Jalə Bayramova həm də anası barədə məlumat paylaşıb. Yazır ki, “İradə Bayramovanın, bütün bədəni göm-göydür. Həmişəki kimi zorakılıq tətbiq ediblər. Təssəvür edə bilmirəm ki, Qubad İbadoğluda vəziyyət necədir. Biz hələ də dərmanları çatdıra bilmirik”. Daxili İşlər Nazirliyi isə açıqlama yaymışdı ki, partiya sədrinin həyat yoldaşı saxlanılmayıb.
İttiham sübuta yetirilsə
Qubad İbadoğlu barədə irəli sürülən ittiham sübuta yetirilərsə, ona beş ildən yeddi ilədək müddətə azadlıqdan məhrum etmə cəzası verilə bilər.
Qubad İbadoğlu nə işlə məşğul idi?
İqtisadçı ekspert Qubad İbadoğlu həm də Amerika Birləşmiş Ştatları və Böyük Britaniya universitetlərində professor kimi çalışıb. İyulun 1-də anasının səhhətinin pisləşməsi ilə əlaqədar Bakıya gəlmədən əvvəl o, London İqtisad və Siyasi Elmlər Məktəbində (London School of Economics and Political Science) professor və baş elmi işçi kimi çalışırdı.
Bundan əlavə Qubad İbadoğlu Cəmil Həsənli və Arif Məmmədovla birlikdə Azərbaycan Gənclərinin Təhsil Fondunu (AGTF) yaradıb və özünün yaydığı məlumata görə, fond 27 iyun 2023-cü ildə Londonda İngiltərə və Uelsin Xeyriyyə Komissiyasında qeydiyyatdan keçib.
