“System of a Down” qrupunun erməni əsilli solisti Serj Tankiyan Bakıda konsert verməyi planlaşdıran “Imagine dragons” qrupunu həmin konserti ləğv etməyə çağırıb. Müğənni bu barədə “Instagram” hesabında paylaşım edib və deyib ki, bu barədə qrupa daha əvvəl məktub göndərsə də heç bir cavab almayıb:
Mən əmin idim ki, onlar Dağlıq Qarabağda 120 min insanı acından öldürən, Azərbaycandakı petro-oliqarx diktatura rejimi ilə bağlı məlumatlı olmayıb. Buna görə də nümayəndələr vasitəsilə ona məktub göndərdim ki, diktatura rejiminin öz imicini təmizləməyə kömək edəcək konserti barədə yenidən düşünməyə çağırdım.
Serj Tankiyan
S.Tankiyan deyir ki, qrupdan mesajına heç bir cavab almadığına görə bu çağırışını ictimailəşdirməyə qərar verib. Müğənnni həm də qrupa göndəriləcək petisiya barədə paylaşıb və izləyicilərini onu imzalamağa çağırıb.
Daha bir soyqırım Azərbaycan tərəfindən törədilir və eyni zamanda onlar Las Veqasdan olan qrupdan həzz alırlar. Bu düzgün deyil!
Serj Tankiyan
Petisiyanı neçə nəfər imzalayıb?
change.org saytında avqustun 13-ü paylaşılan petisiya “Imagine Dragons” qrupundan Azərbaycandakı konserti ləğv etməyi tələb edir. 25 min imza hədəfi olan çağırışı 22 Avqust tarixinə olan məlumata görə, artıq 16 minə yaxın insan imzalayıb.
Söhbət hansı konsertdən gedir?
“Imagine Dragons” qrupunun dünya turnesi çərçivəsində növbəti konserti sentyabrın 2-də Bakıda olacaq. Bakı Olimpiya Stadionunda baş tutacaq konsertə biletlərin qiyməti 50-1100 AZN arasında dəyişir.
