Həyati təhlükəsi olduğu üçün Çeçenistanı tərk edən çeçen qadın Sankt-Peterburqdakı evindən oğurlanıb. OC Media yazır ki, Qroznıya aparılan Seda Süleymanova oğurluq törətməkdə ittiham olunaraq saxlanılıb. İnsan haqları fəalları onun öldürülə biləcəyindən narahatdır.
Seda Süleymanovanı və birlikdə yaşadığı partnyoru Stanislav Kudravçevi bir qrup şəxs 23 avqustda oğurlayıb.
Bu barədə məlumatı kuir haqlarını müdafiə edən NC SOS Böhran Qrupu yayıb.
Cütlüyü oğurlayanlardan ikisi özlərini polis zabiti, digər ikisi isə “mülki geyimli çeçenlər” kimi təqdim edib.
Polis bölməsinə aparılandan qısa müddət sonra Kudryavtsev sərbəst buraxılsa da, Süleymanova 150.000 ₽ (2 700 manat) dəyərində qızıl-zinət əşyaları oğurlamaqda şübhəli bilinərək saxlanılıb.
Süleymanovanın hüquqi təmsilçisi NC SOS Böhran Qrupu onunla əlaqə saxlaya və ya onun harada olduğunu birbaşa dəqiqləşdirə bilməyib. Onlar iddia edirlər ki, Süleymanova qaçırıldıqdan sonra təyyarə ilə Çeçenistana aparılıb.
“İndi onunla heç bir əlaqə yaratmaq münkün deyil. Onun harada olduğunu bilmirik. Sankt-Peterburq polisi də onun harada olduğunu və konkret hansı əsasla apardığını açıqlamır” – Qrup OC Media-ya bildirib.
Qadının təşkilatdan olan vəkili Mark Alekseyevə polis məlumat verib ki, Süleymanova qanuni prosedur olmadan saxlanılıb və onun oğurlamaqda ittiham olunduğu qızıl-zinət əşyalarını tapmaq mümkün olmayıb.
Böhran qrupunun məlumatına görə, Süleymanova əvvəllər ailəsinin təzyiqi ilə üzləşib, onun hüquqları məhdudlaşdırılıb və yerli adət-ənənələrə riayət etməyə məcbur edilib.
“Ailəsi dediklərini etməyəcəyi təqdirdə Süleymanovanı öldürməklə təhdid edib və bu yolla namuslarını təmizləyəcəklərini deyib”.
NC SOS Böhran Qrupu Süleymanovanın işini 2022-ci ilin oktyabr ayından bəri izləyir. O, ailəsi tərəfindən öldürülmək qorxusu ilə bu təşkilata müraciət edib.
Ailəsi bu ilin fevralında Seda Süleymanovanı qaçırmağa cəhd edib. Həmin vaxtdan bəri o, Sankt-Peterburqda yaşayır və işləyirdi.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
