28 avqustda Xankəndinin mərkəzi meydanında planlaşdırılmamış mitinq baş tutub. Mitinq iştirakçıları Arayik Arutyunyanın rəhbərlik etdiyi “hökumətdən” “Dağlıq Qarabağ Respublikasının” taleyi ilə bağlı cavab verilməsini tələb edib.
Etirazçıların qarşısına çıxan Arayik Arutyunyan 29 avqustda keçiriləcək iclasda qərar veriləcəyini açıqlasa da, bu təklif narazılığa səbəb olub. Mitinq iştirakçıları görüşün elə 28 avqustda keçirilməsini və onlayn yayımlanmasını tələb edib. Etirazçılar deyib ki, “hökumətin” xalqı necə qoruyacağı ilə bağlı təkliflərini hamının bilməyə haqqı var.
İclas elə 28 avqustda baş tutub, amma onlayn yayımlanmayıb. Xankəndinin mərkəzi meydanına toplanan etirazçılar iclas bitənə qədər orada gözləyib. 9 saatdan sonra, səhər saat 5-də iclas bitib və Arayik Arutyunyan növbəti dəfə xalqın qarşısına çıxaraq açıqlama verib.
Arazik Arutyunyanın açıqlamasındakı əsas məqamlar:
- 28 avqustda Laçın sərhəd buraxılış məntəqəsində saxlanılan 3 gənc ən qısa vaxtda “Dağlıq Qarabağ Respublikasına” qaytarılacaq.
- Saxlanılan gənclərin valideynlərini “prezident ofisinə” dəvət edib və onların bu gün öz övladları ilə əlaqə yaradacağına söz verib.
- “Dağlıq Qarabağdakı” humanitar böhranın yumşaldılacağı ifadəsi isə mitinq iştirakçılarının etirazına səbəb olub. Onlar tələb edib ki, yumşaldılması yox, birbaşa həll edilməsi vacibdir.
Nə baş verib?
28 avqustda Laçın sərhəd buraxılış məntəqəsində 3 erməni futbolçu saxlanılıb. Onlar 2021-ci ildə Azərbaycan bayrağını təhqir etməkdə ittiham edilirlər.
Hökumətə yaxın caliber.az saytının yazdığına görə hər 3 nəfər “humanizm nümayiş etdirilərək yaşının az olduğunu nəzərə alınaraq” 10 günlük həbs edilib. Həbs müddəti bitdikdən sonra isə onların Ermənistana deport ediləcəyi bildirilib.
