Laçın sərhəd-buraxılış məntəqəsində 3 erməninin Azərbaycan bayrağını təhqiretmə ittihamı ilə saxlanıldığı gün başqa bir neçə erməni də “xüsusi otağa” aparılaraq dindirilib.
Bu barədə tanınmamış respublikanın “prezidentinin” müşaviri Artak Beqlaryan Azadlıq Radiosunun erməni xidmətinə açıqlamasında bildirib.
“Onlara Artsax və Ermənistandakı iqtisadi vəziyyətlə bağlı suallar verilib”.
Artak Beqlaryan
A. Beqlaryan onu da deyib ki, Rusiya sülhməramlı missiyası həmin şəxslərin Azərbaycandan qaytarılması üçün danışıqlar aparır.
Ermənistan XİN həbslə bağlı nə deyir?
28 avqustda bəyanat yayan Ermənistan Xarici İşlər Nazirliyi saxlanılmanı “oğurluq” adlandırıb. Bəyanatda bildirilib ki, futbolçuların səfəri əvvəlcədən planlaşdırılıb və onları Rusiyanın sülhməramlı missiyası müşayiət edib.
Bəyanatda Azərbaycan Dağlıq Qarabağla dialoqdan yayınmaqda və “etnik təmizləmə” siyasəti yürütməkdə ittiham olunur.
“Dağlıq Qarabağ əhalisi aclığa, tibbi ləvazimatların, zəruri malların, qaz və elektrik enerjisinin blokadasına məruz qalır. Habelə yaşından, cinsindən və sağlamlıq vəziyyətindən asılı olmayaraq bütün əsas insan hüquqlarından məhrum edilir”.
Ermənistan XİN
Nə baş verib?
28 avqustda Laçın sərhəd-buraxılış məntəqəsində 3 erməni saxlanılıb. Alen Sarqsyan, Vahe Hovsepyan və Levon Qriqoryan 2021-ci ildə Azərbycan bayrağını təhqiretmədə ittiham edilir.
Hökumətə yaxın caliber.az saytının yazdığına görə hər 3 nəfər “humanizm nümayiş etdirilərək yaşının az olduğunu nəzərə alınaraq” 10 günlük həbs edilib. Həbs müddəti bitdikdən sonra isə onların Ermənistana deport ediləcəyi bildirilib.
Saxlanılan şəxslərlə bu gün ombudsman Səbinə Əliyeva görüşüb. Açıqlanan məlumata görə saxlanılanlar saxlanma şəraitindən, onlarla rəftardan, qidalanmadan, habelə tibbi-psixoloji yardımdan razılıqlarını bildiriblər. Başçəkmənin gedişində həmin şəxslərin ailə üzvləri ilə telefon danışığı da təmin edilib.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
