Naxçıvanda Səhiyyə Nazirliyinin yeni tapşırığına əsasən, tibb işçilərinə kamerası olan smartfonlarla işə gəlmək qadağan olunub. Bu qadağa hələlik Naxçıvan MR Xəstəxanasında, xüsusilə tibb bacılarına və sanitar heyətə tətbiq olunur. Bu barədə “Gündəlik Naxçıvan”a həmin xəstəxanada çalışan bir qrup tibb işçisi məlumat verib.
İşçilər bildirir ki, məqsəd xəstəxanada baş verən özbaşnalıqların telefonla çəkilib, ictimailəşdirilməsinin qarşısını almaqdır.
40 yox, 60 saatlıq iş məcburiyyəti
Xəstəxananın tibb bacıları iş yüklərinin artdığından da şikayət edir. Deyirlər ki, həftədə 40 saat yerinə, 60 saat işləməyə məcbur edilirlər. Tez-tez təhqir olunduqlarını, bu qayda və qadağaların yeni direktorun gəlişindən sonra tətbiq edilməyə başlanıldığını bildirirlər.
Yeni direktor kimdir?
Naxçıvan Muxtar Respublikası Xəstəxanası Publik Hüququ Şəxsə yeni rəhbər Fehruz Zehirov təyin edilib. Bu ilin iyun ayından vəzifəyə gələn Fehruz Zehirov Səhiyyənin Təminat Mərkəzinin İdarə heyətinin sədr müavini vəzifəsində çalışıb.
Əvvəl töhmət, sonra isə işdən qovulma
Təhlükəsizliyə görə “Gündəlik Naxşıvan”ın adını açıqlamadığı tibb işçisi deyir ki, yeni qaydanı pozanlardan əvvəl izahat alınır, sonra isə onlar sərt şəkildə cəzalandırılır:
Xəstəxananın yeni rəhbərliyi işçiləri çox incidir. Kameralı mobil telefon işlətməyə icazə verilmir, ancaq köhnə telefon olmalıdır. Bu işə nəzarəti mühafizəçilərə tapşırıblar. Onlar istədikləri vaxt çantamıza girib, smartfon olub-olmadığını yoxlayırlar. Bu bizim təməl azadlıq və şəxsi toxunulmazlıq hüququmuzun pozulmasıdır. Telefonla tutulan işçilərdən öncə izahat alınır, sonra isə onlara töhmət verilir. Əgər təkrarlanarsa, işdən qovulurlar. Məcbur qalıb, əlavə xərcə düşərək 50 manat verib, köhnə, kamerasız telefonlar almışıq. Fehruz Zehirov gələndən xəstəxanada sanki bir “Gestapo” rejimi yaradıb, həyatımız zəhər olub. Artıq, dözə bilmirik.
Tibb bacısı
Digər tibb bacısı isə deyir ki, onları ayda 240 saat işləməyə məcbur edirlər:
Fehruz Zehirov özü ilə kadrlar şöbəsinə Vüsalə adlı işçi də gətirib. Vüsalə xanım bizimlə qul kimi davranır, ikiqat işləməyə məcbur edir. Nə gecəmiz var, nə gündüzümüz. Həftədə 40 saat yerinə 60-70 saat işləməyə məcbur edir, üstümüzə bağırır, təhqir edir. Etiraz edəni isə, polislə, işdən çıxarmaqla hədələyir. Keçmiş baş həkim Zəburun dövründə də haqsızlıqlar var idi, ancaq bu dərəcədə yox. Bunlar onlardan da qəddardılar.
Tibb bacısı
Məsələyə münasibət öyrənmək üçün “Gündəlik Naxçıvan” Naxçıvan MR Xəstəxanası ilə əlaqə saxlasa da rəhbərlik işçilərin iddialarına cavab vermək istəməyib.
