Azərbaycanla Ermənistan arasındakı gərginlik fonunda Fransa Ermənistana silah satacağını açıqlayıb. Bura hərbi texnika və hava hücumundan müdafiə sistemləri daxildir.
“Politico” nəşri yazır ki, Fransa bu addımı Azərbaycanın Ermənistana hücum etmək ehtimalından narahat olduğu üçün atıb.
Ermənistan hansı silahları alır?
3 ədəd “Ground Master 200” radio lokasiya sistemləri
Safran – durbin və sensorların daxil olduğu avadanlıq
“Mistral” qısamənzilli hava hücumundan müdafiə sistemlərinin gələcək tədarükü ilə bağlı anlaşma memorandumu imzalanıb
Azərbaycanın Ermənistana hücum ehtimalı haradan çıxıb?
Bu ehtimalı sonuncu dəfə ABŞ dövlət katibi Antoni Blinken səsləndirib və bunu “Politico” nəşri dərc edib.
Azərbaycanın hücum edəcəyi ehtimal olunan ərazi isə 2-ci Qarabağ müharibəsindən sonra Azərbaycan rəsmiləri tərəfindən açıq göstərilib – Zəngəzur.
İlham Əliyev müharibədən 1 il sonra Zəngəzur dəhlizi ilə bağlı hərbi müdaxiləni inkar etmirdi. Lakin bir neçə gün əvvəl o öz fikirlərində dəyişiklik edib və hərbi müdaxilə yolunu istəmədiyini bildirib.
20 aprel 2021-ci il – İlham Əliyevin AZTV-yə müsahibəsindən
Biz Zəngəzur dəhlizini icra edəcəyik, Ermənistan bunu istəsə də, istəməsə də. İstəsə, daha asan həll edəcəyik, istəməsə də zorla həll edəcəyik. Necə ki, mən müharibədən əvvəl və müharibə dövründə demişdim ki, bizim torpağımızdan öz xoşunuzla rədd olun, yoxsa sizi zorla çıxaracağıq.
17 oktyabr 2023-cü il – “Füzuli Şəhəri Günü”ndə Füzuli sakinləri ilə söhbətindən
Zəngəzura da, əlbəttə ki, qayıdacağıq, amma sülh yolu ilə. Mən demişəm, məni bəziləri ittiham etməyə çalışırlar, mən dedim ki, biz oraya tanklarla yox, minik maşınları ilə qayıdacağıq.
Azərbaycan rəsmiləri nə deyir?
İlham Əliyevin xüsusi tapşırıqlar üzrə nümayəndəsi Elçin Əmirbəyov: Fransa qarşıdurma və Cənubi Qafqaz regionunun daha da hərbiləşdirilməsi yolu ilə gedir. Bununla Paris regionla bağlı siyasətinin təhlükəli və kifayət qədər proqnozlaşdırıla bilən nəticələrini tamamilə görməzdən gəlir.
Deputat Tural Gəncəliyev: Fransa və Ermənistan arasında hərbi sahədə əməkdaşlıqla bağlı imzalanan sonuncu müqavilə regionda olan həssas balansın pozulmasına yönəlib və Azərbaycanın milli təhlükəsizliyinə xələl gətirəcək hadisədir.
Deputat Adil Əliyev: Fransa Cənubi Qafqazda sülh və əməkdaşlığa üstünlük verirsə, Ermənistana silah vər hərbi texnika əvəzinə ağıllı məsləhət verməliydi ki, problemlərin həlli qonşu dövlətlərlə münasibətlərin normallaşmasından və müvafiq sazişlərin imzalanmasından keçir.
Hökumətyönlü medialar nə yazır?
Aşağıda qeyd edilən başlıqlar son 2 gün ərzində yayımlanan yazı və videolardandır.
Real TV: Fransa Ermənistanı silahlandırır – Paris bu yolla Cənubi Qafqazda sülhə mane olmağa çalışır
AZTV: Makronun qanlı Qafqaz planının üstü açıldı: Bakıya məğlubiyyətinin qisasını belə almağa çalışır?
ARB24: Fransa Cənubi Qafqazda niyə savaş yaradır? – Makronun məxfi Rusiya və Türkiyə siyasətinin DETALLARI
ATV: Fransa Cənubi Qafqazda sülhə qarşıdır
Report: İcma: “Fransanın Ermənistana silah satışı Azərbaycana qarşı düşmənçilikdir”
Trend: Fransa bölgəmizdə müharibə istəyir: səbəblər nədir?
APA: Sabiq XİN başçısı: Avropanı saxlayan Almaniyadır, amma veto hüququ Fransaya verilib – VİDEO
