Keçən həftənin cümə günü, oktyabrın 20-də Dağlıq Qarabağ erməniləri keçmiş “Dağlıq Qarabağ Respublikası”nın Yerəvandakı nümayəndəliyi önündə etiraz aksiyası keçirib.
Etirazçıların tələbləri:
- Qaçqınların evlə təmin edilməsi
- Hərbçilərin maaşlarının ödənməsi
- “Respublikanın” ləğvi ilə bağlı sənədə izahat verilməsi
Etirazçılar iki dəfə polis barrikadasını yararaq binaya daxil olduqdan sonra tanınmamış keçmiş respublikanın “prezidenti” Samvel Şahramanyan onların qarşısına çıxmağa məcbur olub. O, “respublikanın” ləğvi barədə deyilənlərə belə cavab verib:
Xalqın yaratdığı respublika heç bir sənədlə ləğv edilə bilməz.
Samvel Şahramanyan
Bu açıqlama Samvel Şahramanyanın “Dağlıq Qarabağ Respublikası”nın buraxılması haqqında fərmanı imzaladıqdan sonra ilk açıq bəyanatı idi.
Dağlıq Qarabağ Respublikası ləğv olunmayıb. Burada o sənədi oxuyan varmı? O sənədlə bağlı çoxlu suallar var, amma çox şey deyə bilmərəm.
Samvel Şahramanyan
Etiraz aksiyalarının təşkilatçısı kimdir?
Etirazların tanınmamış respublikanın “Təhlükəsizlik Şurasının keçmiş katibi” Samvel Babayanın təşkil etdiyi iddia edilir, lakin etirazçılar bunu təkzib ediblər.
Aksiya iştirakçılarından biri deyib ki, şikayətçilər arasında arasında yüksək vəzifəli məmurlar yoxdur, “çünki onlar bizim pulumuza burada ev alıblar” deyə o, öz qəzəbini ifadə edib.
Biri gəlib şikayət etsin, bir nazir gəlib şikayət etsin. Onun [prezidentin] kadrları etiraza gəlsin. Bunu ona görə etmirlər ki, onların hamısının burada evi var, uşaqları da təhlükəsizlikdədir. Mənim uşaqlarım isə maşında yatırlar.
Etirazçı
O, həmçinin keçmiş “Dağlıq Qarabağ Respublikasının” rəsmilərinin Ermənistandakı evlərinin müsadirə olunaraq həlak olan əsgərlərin və yoxsul Qarabağ ermənilərinin ailələrinə verilməsini tələb edib.
Döyüşçülərin maaşı verilmir
Etirazçıların həllini tələb etdiyi başqa bir məsələ isə Azərbaycanın başlatdığı son hərbi əməliyyatlarda döyüşənlərin maaşları ilə bağlı olub. Oktyabr ayından regionun “dövlət büdcəsi” dondurulub, “hakimiyyət” indiyədək problemin həlli barədə heç bir açıqlama verməyib.
Samvel Şahramanyan etirazçıların qaldırdığı sosial məsələlərin həll olunması üçün aidiyyatı qurumlara yönləndiriləcəyini deyib.
“Dağlıq Qarabağ Respublikasının” gələcəyi ilə bağlı suallara gəlincə, Şahramanyan bildirib ki, o, bu məsələlərin açıq şəkildə müzakirəsini düzgün hesab etmir, çünki bu, “çox təhlükəli” ola bilər.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
