Gürcüstan parlamentinin spikeri Şalva Papuaşvili beynəlxalq donor təşkilatlarını Tbilisidə etiraz aksiyalarında cərimələnən etirazçıların cəriməsini ödəməkdə ittiham edib.
O, Avropa Demokratiya Fondunu (EED) nəzərdə tutaraq Gürcüstandakı etirazçıların cəriməsinin ödənməsini “vətəndaş qarşıdurmasını qızışdırmaq” və “gələcək zorakılıqlar üçün kart blanş” vermək kimi qiymətləndirib.
Papuaşvili bəyan edib ki, beynəlxalq təşkilatlar ən azı 12 nəfərin cəriməsini ödəyib və bu, “qabaqlayıcı tədbir kimi nəzərdə tutulan cərimənin roluna ziyan vurur”.
Cərimələrin sayı artıb
Son illərdə dinc etiraz aksiyalarında iştirakçılara qarşı “xırda xuliqanlıq” və ya “polisə tabe olmamaq” kimi ittihamların sayı artıb. Bununla barabər cərimələrin də tətbiqi çoxalıb.
Məsələn, Tbilisi şəhər məhkəməsi vəkil Eduard Marikaşvilini iyunun əvvəlində əlində boş vərəq saxladığına görə xırda xuliqanlıqda təqsirli bilib.
Polis Marikaşvili ilə yanaşı daha bir neçə nəfəri də saxlayıb. Əllərində olan bannerləri və plakatları götürərək onlara zor tətbiq edib.
Saxlanılan şəxslərin hər biri təxminən 500 lari (315 manat) cərimələnib.
USAID də yaddan çıxmayıb
Gürcüstanın Dövlət Təhlükəsizlik Xidməti (SSG) oktyabrın əvvəlində səsləndirdiyi ittihamı parlamentin spikeri də təkrarlayıb. Təhlükəsizlik xidməti deyirdi ki, ABŞ-ın Beynəlxalq İnkişaf Agentliyinin (USAID) “iğtişaşları qızışdırmaq” planı var.
Ötən həftə USAİD-in Avropa və Avrasiya Bürosunun Administratorunun müavini Erin Makki bu ittihamları “yalan və dezinformasiya” adlandıraraq təkzib edib.
Papuaşvili onun cavabının “qeyri-müəyyən” və “qeyri-adekvat” olduğunu bildirib.
Çərşənbə axşamı “Gürcü Arzusu”nun parlament fraksiyasının sədri Mamuka Mdinaradze Papuaşvilinin ittihamlarını təkrar edib. O, USAİD-in yerli ofisinin Vaşinqtondan asılı olmayaraq fəaliyyət göstərdiyini və “zorakı inqilabi prosesləri təşviq etdiyini” bildirib.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
