Naxçıvanda dövlət idarə və müssisələrində çalışanlara Zəfər Günü və Bayraq Günü bayramlarında işə çıxmaq tapşırılıb.
Bu barədə “Gündəlik Naxçıvan” bir qrup dövlət işçisinə istinadla yazır.
Şikayətçilər deyir ki, 8 və 9 noyabrda işə getmələri ilə bağlı göstərişi prezidentin Naxçıvan üzrə Nümayəndəliyindən alıblar və gəlməyəcəkləri təqdirdə işdən qovulmaqla hədələniblər.
Culfa rayonundakı dövlət idarələrinin birində çalışan Gülnarə Quliyeva deyir ki, tapşırıq nümayəndəlikdən gəldiyinə görə şikayət etməyə yer tapmırlar:
Yoldaşım da, mən də dövlət qulluqçusuyuq. İş günləri olanda uşaqları, bağçaya, məktəbə qoyub işə gedirik. İndi haraya, kimin yanına qoyub gedəcəyik? Bunu soruşanda da cavab verirlər ki, “uşaqlarınızı da özünüzlə işə gətirin, amma səs çıxarmasınlar”. Belə qayda olar?
Gülnarə Quliyeva
Naxçıvan şəhərindən olan başqa bir şikayətçi isə deyir ki, etiraz edənlərə ərizələrini yazıb, işdən çıxmaq məsləhət görülüb:
Dedilər ki, Zəfər Günü günortaya kimi, Bayraq Günü isə, bütün günü işə çıxmalısınız. Qorxumuzdan danışa bilmirik. Çünki, işdən çıxarılmaq təhlükəsi var. İş tapmaq isə çətindir. Bizim istirahət hüququmuz pozulur. Belə çıxır ki, Prezidentin Naxçıvan üzrə nümayəndəsi Fuad Nəcəfli prezidentin öz fərmanına əməl etmir. Onun təyin etdiyi bayram günlərini də bizə qadağan ediblər”.
Şikayətçi
- Baş nazir Əli Əsədovun 20 oktyabr 2023-cü il tarixli qərarı ilə iş və istirahət günlərinin ardıcıllığını təmin etmək məqsədilə noyabrın 10-u (cümə) qeyri-iş günü, noyabrın 4-ü isə (şənbə) iş günü elan edilib.
- Beləliklə, ardıcıl beş gün – 8, 9, 10, 11 və 12 noyabr qeyri-iş günləri hesab olunacaq.
