Keçmiş “Dağlıq Qarabağ Respublikası”nın bir qrup “rəsmisi”, o cümlədən sonuncu “prezidenti” Samvel Şahramanyan “dövlətçiliyin qorunub saxlanması” barədə müzakirə üçün Yerevanda toplaşıb.
“Respublika”nın ləğvindən sonra baş tutan ilk görüş qapalı keçirilib və müzakirələrin sadəcə bəzi təfərrüatları açıqlanıb.
Görüşün tərkibi:
- “Prezident” Samvel Şahramanyan
- “Parlamentin” deputatları
- Ermənistandan olan ictimai-siyasi xadimlər
Təşəbbüskar:
- Artsax Dövlətçiliyinin Qorunması Komitəsinin rəhbəri, erməni müxalifətçi Suren Petrosyan
Komitənin prioritetləri:
- Dağlıq Qarabağın erməni əhalisinin öz müqəddəratını təyinetmə hüququnun tanınmasını təşviq etmək
- Dağlıq Qarabağın təsisatlarını qorumaq
- Qaçqınların öz vətənlərinə təhlükəsiz qayıtmasını təmin etmək
Görüşdə səslənən fikirlər:
Görüşün iştirakçılarından olan sağçı erməni müxalifətçi Ara Zohrabyan deyib ki, Şahramanyanın imzaladığı fərmanın heç bir hüquqi qüvvəsi yoxdur. Əlavə edib ki, “referendumla müstəqil olan” dövləti prezident ləğv edə bilməz. Eyni bu fikirləri oktyabrın sonunda Şahramanyan da iddia edirdi.
Zöhrabyan müzakirənin məzmununu açıqlamasa da “Artsaxın qaytarılacağına” ümid etdiyini bildirib. Lakin kim tərəfindən və necə olacağını deməyib.
Sonuncu “prezident” nə deyir?
Şahramanyan jurnalistlərin suallarını cavablandırmayıb, görüşün təşəbbüskarı olan Suren Petrosyan isə proseslərin davam edəcəyini açıqlayıb.
Dövlətin iki komponenti var – torpaq və insanlar. Hazırda Artsax işğal olunub, amma bizim Artsaxlı soydaşlarımız buradadır. İcma mövcuddur və onların qanuni seçilmiş hökuməti də var. Əgər biz Artsaxa qarşı ambisiyalarımızı və hüquqlarımızı qorumaq istəyiriksə, bu ikinci komponenti qoruya bilməliyik.
Suren Petrosyan
Belə görüş və bəyanatların Ermənistan üçün hansı təhlükəsi var?
“Mühacir hökumətin” bu addımları Ermənistanda narahatlıq yaradır. Bəziləri düşünür ki, bu bəyanatlar Azərbaycanın Ermənistana hücumu ilə nəticələnə bilər.
Suren Petrosyan bu cür narahatlıqları rədd edərək, prosesin “hakimiyyət tərəfindən təşkil olunmadığını” bəyan edir.
Demokratiya və Təhlükəsizlik Regional Mərkəzinin rəhbəri Tiqran Qriqoryan isə deyir ki, bu cür təşəbbüslər Ermənistan üçün təhlükə yarada bilər.
Uzunmüddətli perspektivdə hesab edirəm ki, bu, Ermənistan hakimiyyəti üçün kifayət qədər təhlükəli olacaq, çünki Azərbaycan tərəfindən bütün bu qurumların ləğvi üçün təzyiqlər olacaq.
Tiqran Qriqoryan
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.