Avropa Komissiyası Gürcüstana namizəd statusu verilməsi ilə bağlı Avropa İttifaqına tövsiyə edib. Bu, dekabrın sonunda keçiriləcək Aİ Şurasının iclasında ölkənin üzvlük prosesinə başlaması üçün zəmin yaradıb.
Qərarı Komissiyanın sədri Ursula fon der Leyen elan edib. O, Gürcüstan vətəndaşlarının böyük əksəriyyətinin Aİ-yə qoşulmaq üçün istəklərini tam dəstəklədiyini bildirib, lakin “bu istəyi rəsmilərin daha yaxşı əks etdirməsinə ehtiyac olduğunu” deyib.
Əgər Aİ Şurası gözlənildiyi kimi tövsiyəyə əməl edərsə, bu, Gürcüstana namizəd statusunun verilməsi ilə nəticələnəcək.
Avropa Komissiyası həmçinin Ukrayna və Moldova ilə üzvlüyə qəbul barədə danışıqların başlanmasını tövsiyə edib. Bu iki ölkə Rusiyanın Ukraynaya genişmiqyaslı hərbi müdaxiləsindən sonra üzvlük üçün müraciət edib. OC Media yazır ki, Gürcüstan hökuməti isə ictimai təzyiq nəticəsində üzvlük üçün “həvəssiz müraciət etməyə məcbur qalıb”.
12 prioritet və Gürcüstan hökuməti
Gürcüstana namizəd statusunun verilməsi üçün Avropa İttifaqı hökumətə yerinə yetirməli olduğu 12 “prioritet”dən ibarət siyahı göndərib. Bu tələblərə daxildir:
- “de-oliqarxizasiya”
- məhkəmə islahatları
- azad və ədalətli seçkilərin keçirilməsi
- korrupsiya ilə mübarizə
- mətbuat azadlığı
Hökumət bu tələbləri tamamilə yerinə yetirməsə də komissiya tövsiyə edib ki, Gürcüstana Aİ üzvlüyünə namizəd statusu verilsin.
Ursula fon der Leyen, “hökumətin mühüm islahat addımları atdığını başa düşərək” Gürcüstanın namizədliyini tövsiyə etdiklərini deyib. O, həm də hökuməti “milli maraqlarla bağlı məsələlərdə müxalifət və vətəndaş cəmiyyəti ilə daha çox məşğul olmağa” çağırıb.
Müxalifət nə deyir?
Aİ-nin Gürcüstan hökumətinin üzvlük meyarları istiqamətində “məhdud irəliləyişini” müsbət qiymətləndirməsinə baxmayaraq, Gürcüstandakı müxalif partiyalar və vətəndaş cəmiyyəti demək olar ki, yekdilliklə bunun əksini iddia edir.
Vahid Milli Hərəkatın sədri Levan Xabeişvili deyib ki, Gürcü xalqının sarsılmaz iradəsi və Avropanın Gürcüstanın Rusiyanın əyalətinə çevrilməsinə mane olmaq istəyi birinci raundda qalib gəlib.
Müxalifətdəki “Lelo” qrupunun həmtəsisçisi Badri Caparidze tövsiyə olunan islahatları həyata keçirmək əvəzinə prosesdə “təxribat” etməyə cəhd göstərən “Gürcü Arzusu”na “başsağlığı” verib.
Rəsmilər nə deyir?
Gürcüstanın baş naziri İrakli Qaribaşvili Gürcüstanın namizəd statusunu tövsiyə etdiyinə görə Avropa Komissiyasına təşəkkür edib.
Hökumətlə getdikcə daha çox ziddiyyət yaşayan prezident Salome Zurabişvili isə deyib ki, o, islahatları asanlaşdırmaq və təkan vermək üçün Avropayönümlü lider kimi rolunu davam etdirəcək.
- Gürcüstanın üzvlüyə namizədliyi ilə bağlı yekun qərarın dekabrın 14-15-də keçiriləcək Aİ sammitində qəbul ediləcəyi gözlənilir.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
