“Abzas Media”nın direktoru Ülvi Həsənli saxlanılan zaman polis zorakılığı ilə üzləşib. Bu barədə məlumatı medianın ofisindəki axtarışda iştirak edən zaman özü jurnalistlərə verib.
Ülvi Həsənli deyib ki, saxlanılan zaman onun gözündən yumruqla vurublar. Daha sonra Bakı Şəhər Baş Polis İdarəsinə aparılaraq orada da qeyri-insani davranışa və işgəncəyə məruz qalıb. O bildirib ki, yumruq və təpik zərbələri endirilib.
Ülvi Həsənli qeyd edib ki, polis idarəsində ona verilən suallar Abzas Media-nın korrupsiya cinayətləri ilə bağlı araşdırmaları haqda olub.
Abzas Media redaksiya bəyanatı yayaraq Ülvi Həsənlinin həbsində İlham Əliyevi məsuliyyətli hesab etdiklərini açıqlayıblar.
Biz ölkə prezidentinin və onun təyin etdiyi məmurların korrupsiya cinayətləri ilə bağlı silsilə araşdırmalar apararaq, sizə təqdim edirik. Ü. Həsənlinin saxlanılmasının yaydığımız bu korrupsiya araşdırmaları ilə bağlı olduğunu düşünürük.
Abzas Media
Nə baş verib:
Bu gün səhər saatlarında Abzas Medianın direktoru Ülvi Həsənli saxlanılıb. Bunun ardında onun evində və saytın redaksiyasında axtarış aparılıb.
5 saat davam edən axtarışdan sonra ofisdən 40 min avro pul “aşkarlanıb”. Abzas Media iddia edilən vəsaitin sayta aid olmadığını və istintaq orqanlarının məqsədli şəkildə onların fəaliyyətini dayandırmaq, Ülvi Həsənliyə qarşı ittiham irəli sürmək üçün uydurduğu ssenari olduğunu bəyan edib.