“Abzas Media”nın baş redaktoru Sevinc Vaqifqızı noyabrın 21-i səhərə yaxın hava limanında, təyyarədən enərkən saxlanılıb. Onunla birlikdə təyyarədə olan ictimai fəallar Əbülfəz Qurbanlı və Sübhan Həsənlinin verdiyi məlumata görə, mülki geyimli polislər Vaqifqızına pasport yoxlamasından keçməyə icazə verməyib və deyib ki, onlarla birlikdə polis bölməsinə getməlidir.
Bakı Şəhər Baş Polis İdarəsinə aparılan Sevinc Vaqifqızı barəsində cinayət işi açılıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq törətdikdə) maddəsi ilə ittiham irəli sürülüb. Vəkil Elçin Sadıqovun sözlərinə görə, bu gün Xətai Rayon Məhkəməsi Sevinc Vaqifqızı barəsində həbs qətimkan tədbiri seçəcək.
Ötən gün həm də ictiami fəal Məhəmməd Kekalov saxlanılıb. Artıq 24 saat keçsə də onun harada olduğu bilinmir və bu barədə fəalın ailəsinə və yaxınlarına məlumat verilmir. Onun yerini öyrənmək üçün vəkili Rövşanə Rəhimli Ombudsman Aparatına müraciət etsə də nəticə olmayıb. Bakı Şəhər Baş Polis İdarəsindən vəkilə deyilib ki, fəal idarədə deyil.
