Naxçıvan Perinatal Mərkəzinə (keçmiş Doğum Evi) barəsində dəfələrlə cinayət işi açılan ginekoloq-cərrah baş həkim təyin olunur.
Bu barədə məlumatı “Gündəlik Naxçıvan” Naxçıvan Səhyiyə Narizliyindəki mənbəsinə istinadla yazır.
Məlumata görə, ana və uşaq ölümləri, rüşvət almada ittiham edilən ginekoloq-cərrah Nəzakət Gülməmmədova “artıq baş həkim təyin edilib, sərəncam isə yaxın günlərdə ictimailəşdiriləcək”.
N. Gülməmmədova əvəzinə baş həkim istefa verib
Ginekoloq-cərrahın ittiham edildiyi son ölüm hadisəsi keçən ilin oktyabrında baş verib. Onun əməliyyat etdiyi Babək qəsəbə sakini 43 yaşlı Sveta Xudiyeva bir neçə saat sonra vəfat edib. Mərhumun qohumları “Gündəlik Naxçıvan”a bildiriblər ki, Nəzakət Gülməmmədova fiziki cəhətdən hazır olmayan xəstəni əməliyyata salıb. Qohumların sözlərinə görə, cərrah bunu onlardan 700 manat rüşvət ala bilmək üçün edib.
Hadisə ictimailəşdikdən sonra Naxçıvan prokurorluğu onun barəsində rüşvət alma və səhlənkarlıq səbəbindən ölümə səbəb olma ittihamı ilə cinayət işi açıb.
Baş verənlərdən sonra mərkəzin o vaxtkı baş həkimi Kifayət Məmmədova tutduğu vəzifədən istefa verib. O, mərkəzdəki rüşvətxorluq və müxtəlif səbəblərdən qarşısını ala bilmədiyi çoxsaylı ölüm hallarına etiraz olaraq istefa verdiyini açıqlayıb.
“İşi bağlamağın” qiyməti – 80 min manat
Nəzakət Gülməmmədovanın baş həkim təyin olunması ilə bağlı məlumatı təsdiqləyən Perinatal Mərkəzin əməkdaşları ginekolog-cərrahın son ölüm hadisəsindən sonra həbs ediləcəyini gözləyib, lakin bu baş verməyib.
Artıq, dünəndən bu vəzifədə fəaliyyətə başlayıb. Gəldi, dedi ki, 80 min manat verib, işi bağladım, məni istəməyənlər qalsınlar yana-yana. Xəstələri soyub, nazirliyə yaxşı pul qazandırdığı üçün onu gözlərinin üstündə tuturlar. Doğuşa gələn hər bir xəstəyə xüsusi iynə vurub, keysəriyyə əməliyyatına məcbur edir və hərəsindən min manat rüşvət alır. Başqa qanunsuz əməlləri ilə də pul qazanır. Təbii ki, bu pulu tək yemir, yarıdan çoxu yuxarıya gedir.
Perinatal Mərkəzin əməkdaşları
- Bu, 66 yaşlı Nəzakət Gülməmmədovanın ölümdə ittiham edildiyi ilk hal deyil. Bundan əvvəl də bir neçə ana və uşaq ölümünə görə barəsində cinayət işi açılıb. Naxçıvan prokurorluğu bu işlərin aqibəti ilə bağlı indiyə kimi heç bir rəsmi məlumat yaymayıb.
