Hazırda həbsdə olan professor Qubad İbadoğlunun səhhəti pisləşib və buna görə də həkim ona 10 gün ərzində sistem köçürülməsinə qərar verib. Bu barədə məlumatı, professorun qardaşı Qalib Toğrul yayıb. 7 aya yaxındır ki, Bakı İstintaq Təcridxanasnda saxlanılan professorun qardaşı deyir ki, növbəti endokrinoloq müayinəsindən sonra II tip şəkərli diabet xəstəsi olan İbadoğluna polineyropatiya diaqnoz qoyulub. Həkim 10 günlük sistem köçürülməsi bitəndən sonra bir aylıq dərman müalicəsi təyin edib.
Qalib Toğrul sistem üçün tələb olunan dərman və ləvazimatların artıq Bakı İstintaq Təcridxanasının Tibbi Sanitar Hissəsinə (“Sançast”) təqdim edildiyini bildirib.
Professorun qardaşı yaydığı məlumatda bildirib ki, saxlanıldığı müddətdə onun qanındakı şəkər aşağı düşməyib və buna səbəb onun saxlanma şəraiti, stress və gündəlik azı 2 saat gəzinti hüququndan məhrum edilməsi olub.
Tibbi sənədlərdə saxtakarlıq edən Ədliyyə Nazirliyinin Tibb Baş İdarəsi qardaşımın səhhətinin sürətlə pisləşməsini (faktiki vəziyyəti) artıq etiraf etməli olub ki, ona müalicə kursu təyin edilib. Hələ də qanda şəkərin yüksək səviyyəsinin qardaşımın digər daxili orqanlarında (böyrək, qaraciyər, göz və sair) hansı fəsadlara yol açmasından xəbərsizik.
Qalib Toğrul
Nə baş verib?
İqtisadçı ekspert, professor və Azərbaycan Demokratiya və Rifah Partiyasının sədri Qubad İbadoğlu 2023-cü il iyulun 23-də həyat yoldaşı İradə Bayramova ilə birlikdə saxlanılıb. Bir müddət sonra həyat yoldaşı sərbəst buraxılıb və növbəti gün Qubad İbadoğluna Bir gün sonra Cinayət Məcəlləsinin 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma), 204.3.1-ci (eyni əməllər mütəşəkkil dəstə tərəfindən törədildikdə) maddələri ilə cinayət işi açılıb. O həm də FETÖ ilə əlaqədə ittiham olunub.
- Onun salxanılmasından sonra Azərbaycanda Daxili İşlər Nazirliyinin yaydığı rəsmi məlumatda qeyd olunub ki, Türkiyə Daxili İşlər Nazirliyindən daxil olan məlumat əsasında əməliyyat keçirilib və bu əməliyyat zamanı professor saxlanılıb.
- London İqtisadiyyat və Siyasi Elmlər Məktəbinin (LSE) qonaq baş elmi işçisi olan Qubad İbadoğlunun həbs qətimkan tədibiri həmin vaxtdan bəri uzadılıb və o, ev dustaqlığlına buraxılmayıb.
- Professorun həbsindən sonra London İqtisadiyyat və Siyasi Elmlər Məktəbi Qubad İbadoğlunun müqaviləsini daha iki il uzadıb və eləcə də onun azadlığa buraxılması tələbi ilə bəyanat yayıb.
