“Bank of Georgia” Ermənistanın ən böyük banklarından biri olan “Ameriabank”ı 303,6 milyon dollara almaq barədə razılığa gəlib. Bazar ertəsi “Bank of Georgia Group” Ermənistan bankının 90%-ni almağı təklif etdiyini açıqlayıb. Müqavilə Avropa Yenidənqurma və İnkişaf Bankına (AYİB) bankdakı 10% payını saxlamağa imkan verəcək.
Satınalma hələki tənzimləyici orqanlar, o cümlədən Ermənistan Mərkəzi Bankı tərəfindən təsdiqlənməyib.
1992-ci ildə qurulan Ameriabank Ermənistanın ən böyük banklarından biridir və 2023-cü ildə ölkədə ən çox vergi ödəyən şirkətlər siyahısında yeddinci olub. İldə təxminən 64 milyon dollar vergi verib. Bank qismən keçmiş “Dağlıq Qarabağ Respublikası”nın keçmiş dövlət naziri Ruben Vardanyana məxsusdur.
Bank of Georgia Group, Ameriabankı almaqla bağlı açıqlamasından sonra bankın adının da dəyişdiriləcəyini qeyd edib.
“Ameriabank” bildirib ki, bank “Bank of Georgia Group”un daxilində “öz brendi və mövcud rəhbərliyi altında, Ameriabank-ın qəbul edilmiş strateji məqsədlərinə, dəyərlərinə, missiyasına və vizyonuna sadiq olan” müstəqil bir qurum kimi fəaliyyət göstərəcək.
Mübahisəli satınalma
“Ameriabank”ın rəsmi saytında qeyd olunub ki, Ruben Vardanyan bankın 49% payının sahibidir. Satış Ermənistanda çaşqınlıq yaradıb və bəziləri bunun səhmdar Ruben Vardanyanın razılığı olmadan baş tuta biləcəyini ehtimal edir.
Vardanyanın siyasi müttəfiqi Mesrop Arakelyan bazar ertəsi silinmiş Facebook paylaşımında milyarderin “bankın mümkün satışı ilə heç bir əlaqəsi olmadığını” iddia edib.
Bəziləri hətta Azərbaycanın Vardanyana öz səhmlərini satmasına təsir göstərə biləcəyini ehtimal ediblər. Ermənistanın “Hetq” media orqanının baş redaktoru Edik Baqdasaryan Vardanyanın sövdələşmədən xəbəri olub-olmadığını və ya Yerevanın Azərbaycanın potensial iştirakını araşdırıb-araşdırmadığını sual edib.
“Ameriabank-ın ən böyük səhmdarı Ruben Vardanyandır. 2023-cü il sentyabrın 27-dən Bakı həbsxanasındadır. Aydındır ki, onun bu sövdələşmədən xəbəri yoxdur. Hökumət Əliyevin Vardanyanı bankı satmağa məcbur edib-etmədiyini öyrənməyə çalışıbmı?”, o soruşub.
“Hetq”in Vardanyanın razılığının olub-olmaması ilə bağlı sorğusuna nə “Ameriabank”, nə də Ermənistan Mərkəzi Bankı cavab verib.
Satınalma ilə bağlı Ermənistan tərəfindəki digər narahatlıq Azərbaycan və Türkiyə vətəndaşlarının “Bank of Georgia”da səhmlərə sahib olması ilə bağlıdır. Halbuki, ermənistanlı ekspert Haykaz Fanyan hesab edir ki, bu, təhlükəsizlik riski yaratmayacaq və bu cür səhmdarların şirkətdə saxlanılan şəxsi məlumatları əldə etmək imkanı olmayacaq.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
