Ermənistanın Baş naziri Nikol Paşinyanın 22 fevralda Fransanın “France 24” kanalına müsahibə verib. Müsahibədə Azərbaycanın Ermənistana qarşı yeni müharibəyə hazırlaşdığını qeyd edib.
O deyib ki, rəsmi Bakı Ermənistana “Qərbi Azərbaycan” kimi baxır.
İlham Əliyev sülh istəmir. Ərazilərin qarşılıqlı tanınmasını istəmir. O, Ermənistan ərazilərini işğal etmək istəyir.
Nikol Paşinyan
Azərbaycan XİN Ermənistanın Baş nazirinin bu açıqlamalarına dərhal cavab verib.
Azərbaycana qarşı səsləndirdiyi əsassız iddialar bölgədə qəsdən gərginlik yaradaraq, sülh prosesinə növbəti zərbə vurmaq məqsədi daşıyır – deyə Xarici İşlər Nazirliyinin açıqlamasında qeyd edilib.
XİN-in şərhində Azərbaycan, Ermənistan və Almaniya liderlərinin sonuncu 3 tərəfli görüşü də xatırladılır.
Nazirlik hesab edir ki, Ermənistan tərəfinin bu kimi açıqlamaları və “bunun üçün məkanın məhz Fransa olaraq seçilməsi” Fransanın sülh prosesinə mənfi təsir göstərməsidir. Bəyanatda həm də bu addım “Almaniyanın səylərinə Ermənistan tərəfinin hörmətsizliyi” kimi qiymətləndirilib.