Azərbaycan Xalq Cəbhəsi Partiyasının (AXCP) sədri Əli Kərimli barədə xüsusi ittiham qaydasında cinayət işi başladılıb.
Bu barədə o özü rəsmi “Facebook” hesabında məlumat yayıb.
İşlə bağlı nə məlumdur: Məhkəmənin hazırlıq iclası 13 avqust, saat 11:00-da Nəsimi rayon məhkəməsində olacaq. Məhkəmədən Əli Kərimliyə göndərilən bildirişdə xüsusi ittihamın kim tərəfindən qaldırıldığı qeyd edilməyib. Elektron məhkəmə portalında da şikayətçinin kimliyi yoxdur.
Hökumətyönlü media nə yazır: Hökumətə yaxınlığı ilə bilinən “Qafqazinfo” saytı yazır ki, Əli Kərimli AXCP üzvlüyündən xaric edilən Aydın Əliyev tərəfindən məhkəməyə verilib.
Aydın Əliyev kimdir: 1995-ci ildən AXCP-nin üzvü olub, 27 sentyabr 2015-ci ildə AXCP-nin qurultayında Nəzarət Təftiş Komissiyasına üzv, sonra sədr seçilib. AXCP Ali Məclisinin Rəyasət Heyətinin ümumi yığıncağının 10 iyun 2019-cu il tarixli qərarı ilə Aydın Əliyev partiya sıralarından kənarlaşdırılıb. Sonradan məhkəmə qərarı ilə partiyaya geri qaytarılıb.
Əli Kərimli nə deyir: Partiya sədri açıqlama yayıb ki, bu cinayət işi repressiya maşınının növbəti saxtakarlığı, növbəti üzəduranlığıdır.
