26 Dekabr: Mehman Hüseynov həbsxana əməkdaşına zor tətbiq etməkdə ittiham edildi və ona qarşı yeni cinayət işi açıldı.
27 Dekabr: Mehman buna etiraz olaraq quru aclıq aksiyasına başladı.
29 Dekabr: Bloqqerin ittiham olunduğu maddə ağırlaşdırıldı. Yeni maddə (317.2) ilə onu 5 ildən 7 ilə qədər həbs gözləyir.
30 Dekabr: Mehman Hüseynov qardaşının təkidi ilə quru aclığı dayandıraraq yalnız su qəbul etməyə başladı.
3 Yanvar: Mehman Hüseynova azadlıq tələbi ilə aksiya keçirildi və onlar polis zorakılığına məruz qaldı. Jurnalistlər də daxil olmaqla bir neçə nəfər saxlanıldı.
Həmin gün axşam saatlarında sosial şəbəkə istifadəçiləri prezidentin qızı Leyla Əliyevanın rəsmi Instagram hesabına Mehmanı azad etməyi tələb edən şərhlər yazmağa başladı. Çox keçmədi ki, şərhlər silindi.
4 Yanvar: Dəstək aksiyasında saxlanılanlardan 4 nəfərə sutkalıq, 4 nəfərə isə cərimə cəzaları verildi. Sutkalıq həbs edilənlər arasında jurnalitlər də var idi.
4 yanvardan etibarən bir neçə fəal Mehman Hüseynova dəstək üçün aclıq aksiyasına başladı.
Elə həmin gün sosial şəbəkə istifadəçiləri bu dəfə İlham Əliyevin facebook profilini hədəfə aldı. Onların Mehmanı azad etməyi tələb edən şərhləri tezliklə silindi və yazanlar blok edildi.
5 Yanvar: AŞPA həmməruzəçiləri Mehman Hüseynovla bağlı Azərbaycan hakimiyyətinə çağırış etdi. Onların bəyanatında yeni cinayət işinin siyasi motivli olduğu qeyd edildi.
Amerika senatoru Marko Rubio da rəsmi Bakını bloqqer Mehman Hüseynovu dərhal azad etməyə çağırdı.
Həmin gün axşam reper Camal Əli Mehmana dəstək üçün yazdığı yeni track-i paylaşdı. “My queen” adlanan trackdə kraliça kimi vitse-prezident Mehriban Əliyeva qələmə verilib.
6 Yanvar: ABŞ-ın “Washington Post” qəzetinin redaksiya heyəti Mehman Hüseynovdan yazdı. Redaksiya tələb etdi ki, bloqqer azad olunmalıdır.
Müsavat Partiyası bloqqerə azadlıq tələbi ilə keçiriləcək mitinq qərarı verdi. Yanvarın 12-i saat 15:00-da baş tutacaq mitinqin yeri hələ ki, məlum deyil.
Yanvarın 6-da həm də Apelyasiya Məhkəməsi qarşısında bir qrup gənc, Mehman Hüseynova dəstək üçün aksiya keçirib. Aksiyada təşkilatçı da daxil olmaqla 6 nəfər saxlanılıb. Onların bəzilərinə sutkalıq, bəziləri isə cərimə cəzası verilib.
7 Yanvar: Ombudsman nümayəndələri Mehman Hüseynova baş çəkib, açıqlama yaydılar ki, o, aclıq aksiyası keçirmir.
