Ukrayna hava yollarına məxsus təyyarəni İranın raketlə vurması iddiasını rəsmi Tehran qəbul etməyib. AP yazır ki, İran Milli Aviasiya Departamentinin rəhbəri Əli Əbidzadə Qərbin bu iddialarına cavab verib:
Bizim üçün aydın olan və əminliklə deyə biləcəyimiz odur ki, təyyarəni heç bir raket vurmayıb. Əgər onlar əmindirlərsə, onda gəlsinlər və tapdıqları sübutları dünyaya göstərsinlər.
İran parlamenti Pentaqonu terror təşkilatı, ABŞ ordusundakı əsgərləri isə terrorçu kimi tanıyıb.
İranın istintaq komandasının rəhbəri Həsən Rezayifar deyib ki, qara qutudakı məlumatları əldə etmək bir aydan çox vaxt apara bilər və istintaq gələn ilə qədər uzana bilər. O həm də deyib ki, uçuşdakı qeydlərin çıxarılması mümkün olmasa, beynəlxalq mütəxəssislərdən kömək istəyə bilərlər.
Qərb nə deyib: Kanadanın baş naziri ötən gün deyib ki, Ukrayna hava yollarına məxsus təyyarənin İran raketinin vurduğuna dair sübutlar var. O hesab edir ki, ola bilsin bu, səhvən olub.
Nə baş verib: Yanvarın 8-i Ukrayna hava yollarına məxsus təyyarə Tehranda qəzaya uğrayıb. Təyyarədəki 176 nəfər sərnişin və ekipaj üzvünün hamısı həlak olub. İlkin məlumatda qəzanın səbəbi kimi mühərrikin alovlanması göstərilmişdi.
