Daxili İşlər Nazirliyi deputatlığa namizədlərin polisə çağırılması barədə məlumatları təkzib edib. Nazirliyin mətbuat xidmətinin rəisi Ehsan Zahidov “Report”a deyib ki, iddialar əsassızdır:
Polis, seçkiqabağı təşviqat prosesinin gedişinə müdaxilə etmir və qanunla da polisin siyasi fəaliyyətə müdaxiləsi qadağandır. Lakin ictimai qaydanı qorumaq, ictimai təhlükəsizliyi təmin etmək polisin əsas vəzifəsidir. Ona görə də seçkiqabağı təşviqat prosesində ictimai qaydanı pozan hərəkətlərin qarşısı polis tərəfindən alınır və bu cür hallar üzrə araşdırma aparılır. Yalnız qeyd etdiyim əməllərlə əlaqədar, eləcə də namizədin seçicilərlə görüşünə mane olma, təşviqat-nəşr materiallarını qəsdən məhv etmə kimi hüquqpozma törətmiş şəxs polisə dəvət edilir, onunla profilaktik söhbətlər aparılır və ya məsələ qanunvericiliyə uyğun olaraq rəsmiləşdirilir, o cümlədən protokol tərtib edilir yaxud araşdırmaların nəticələri üzrə digər qərarlar qəbul olunur.
Qurumun sözcüsü deyib ki, əgər qanun pozuntuları ilə bağlı polisin səlahiyyətlərinə aid olan məlumatə deputatlığa namizəd veribsə, bu halda da araşdırma aparılıb lazımi tədbirlər görülür.
