İranın İnformasiya və Kəşfiyyat Nazirliyi açıqlama yayıb ki, Şiraz şəhərindəki Şahçıraq ziyarətgahında törədilən terror aktının koordinatoru Azərbaycan vətəndaşı olub. Nazirliyin bu gün paylaşdığı məlumatda belə deyilir.
Nə baş verib: 26 oktyabrda Şiraz şəhərinin Şahçıraq ziyarətgahında 13 nəfərin həlak olduğu terror aktı baş verib. Həmin hadisəyə görə 26 nəfər həbs edilib. Həbs edilənlərin İran vətəndaşı olmadğını açıqlayan nazirlik, onların Azərbaycan, Tacikistan və Əfqanıstan vətəndaşları olduğunu bildirib.
İran nəyi iddia edir: Nazirliyin açıqlasına görə İrandakı əməliyyatların istiqamətləndirilməsi və əlaqələndirilməsindəki əsas adam Azərbaycan Respublikasının vətəndaşı olub. Məlumata görə, saxlanılan şəxs Heydər Əliyev adına hava limanından İmam Xomeyni adına hava limanına endikdən sonra Azərbaycandakı əlaqələndirici şəxsə və İŞİD-in Əfqanıstandakı əməliyyat qərargahına Tehranda olmasi ilə bağlı məlumat verib.
Saxlanılanlar barədə nə məlumdur: İnformasiya və Kəşfiyyat Nazirliyinin məlumatında bildirilir ki, saxlanlanlar Fars, Tehran, Əlborz, Kirman, Qum və Rəzəvi Xorasan vilayətlərində təqib edilərək həbs ediliblər. Deyilir ki, onlardan bəziləri ölkədən qaçarkən şərq sərhədlərində həbs edilib. Terror törətməkdə ittiham edilənlərin Zahidan və digər şəhərlərdə də terror əməliyyatları həyata keçirməyi planlayıblar.
Rəsmi Bakı nə deyir: Hələlik heç bir açıqlama yoxdur.
- 1 Noyabrda DTX İranın xüsusi xidmət orqanının nəzarətindəki silahlı birləşməni ifşa etdiyini açıqlayıb. Məlumata görə 19 nəfər Azərbaycan vətəndaşı istintaqa cəlb olunub, barələrində cinayət işi açılıb.
- DTX-nın yaydığı rəsmi məlumatda həm də İranın Azərbaycandakı səfirliyi ittiham olunur. Bildirilir ki, hərbi təlimlərdə iştirak edən Fəqan Məmmədov üzərində dini şüarlar yazılan köynəkləri ölkənin bəzi rayonlarında keçirilməsi planlaşdırılan aksiyaların iştirakçılarına paylayıb. Onun həmin köynəkləri səfirliyə məxsus maşınla Azərbaycana gətirdiyi iddia edilir.
