Bakı İstintaq Təcridxanasında saxlanılan iqtisadçı Qubad İbadoğluna göndərilən sovqat ona çatdırılmır.
Bu barədə onun qardaşı Qalib Toğrul məlumat yayıb.
O bildirib ki, kitab, dərman, qida və sanitar təmizlik üçün nəzərdə tutulan vasitələr professora verilməyib.
Qubad İbadoğlu şəkər xəstəsidir və o, dietik qidalar yeməlidir. Lakin ailəsinin ona göndərdiyi qarabaşaq (qreçka) ona çatdırılmayıb.
Qardaşı yazır ki, sanitar qovşağını təmizləmək məqsədilə göndərdikləri “Domestos”u belə müsadirə ediblər.
Dərmanlarla bağlı isə onlara “öncə həkim baxmalıdır” deyilib.
Nə baş verib?
Azərbaycan Demokratiya və Rifah Partiyasının sədri, iqtisadçı Qubad İbadoğlu 23 iyulda saxlanılıb. Onun barəsində Cinayət Məcəlləsinin 204.1-ci – satış məqsədi ilə saxta pul, qiymətli dövlət kağızları əldə etmə və ya satma – maddəsi ilə cinayət işi başlanıb. Qubad İbadoğlu öz həbsi barədə qısa şərh verə bilib: “İlham Əliyevin sifarişilə saxlanılmışam”.
Həbslə bağlı Azərbaycan Daxili İşlər Nazirliyinin yaydığı rəsmi məlumata görə, əməliyyat Türkiyə Daxili İşlər Nazirliyindən daxil olan məlumat əsasında keçirilib.
