“Hökumətin” nəzarəti altındakı “Milis” silahlı dəstəsi keçən həftə tanınmamış Dağlıq Qarabağ Respublikasının parlament binasına daxil olub və “prezident” Arayik Arutyunyanın istefasını tələb edənləri müəyyənləşdirməyə çalışıb.
Müxalifətdən olan deputatlar bildirib ki, “Milis” üzvlərinin bir sualı olub: “Arutyunyanın istefasını kim tələb edir?”.
Parlamentdəki hər iki müxalifət partiyası prezidentin istefasını tələb etdiklərini təkzib edib.
“Vahid Vətən” fraksiyasından olan Marsel Petrosyan bazar ertəsi Azadlıq Radiosuna bildirib ki, “istefa tələbi yoxdur”.
Bəs tələb söhbəti necə ortaya çıxıb?
Arutyunyanın istefası barədə tələbi sonuncu dəfə erməni əsilli rus milyarder Ruben Vardanyan səsləndirib. O, bazar günü “Facebook”-da canlı yayımda deyib ki, Arutyunyan istefa edəcəyini həftənin əvvəlində 8 nəfərin iştirak etdiyi iclasda vəd edib.
“Həmin iclasda iştirak edən 8 nəfərdən bəziləri sizin sözünüzə inanmadı. Başqa bir hissəsi: “Bəlkə bu dəfə düz deyir” dedi” – Ruben Vardanyan bildirib.
Ruben Vardanyan
O, həmçinin Arutyunyanı dövlət qurumlarını “dağıtmaqda” günahlandıraraq, milislərinin parlamentə girməsinə icazə verdiyinə görə tənqid edib.
“Milis” nədir və barəsində nə məlumdur?
Silahlı dəstə 2020-ci ilin oktyabrında İkinci Qarabağ müharibəsi zamanı “parlament” tərəfindən yaradılıb. Mülki könüllülərdən ibarət olan dəstə Müdafiə Nazirliyinin nəzarəti altındadır.
Rəhbəri Karen Matevosyan bazar ertəsi “Facebook”-da canlı yayımda çıxışı zamanı Harutyunyana dəstək verib.
O, milislərin Dağlıq Qarabağın erməni əhalisini “öldürülməkdən” xilas etmək üçün yaradıldığını və milislərin regionun daxili siyasətinə birbaşa müdaxilə etmədiyini bildirib.
Arutyunyan milis nümayəndələri parlamentə daxil olduqdan bir gün sonra, avqustun 17-də onlarla görüşüb. Görüşdə nə danışıldığı barədə ictimaiyyətə məlumat verilməyib.
Arutyunyan istefa verir, ya yox?
“Prezident” ofisi və hakim Azad Vətən Partiyası bazar günü Arayik Arutyunyanın istefa verməyi planlaşdırdığını təkzib edib.
Bununla belə Arutyunya 2020-ci ildə İkinci Qarabağ müharibəsi başa çatdıqdan sonra bir neçə dəfə hakimiyyətdən getməyin mümkünlüyündən danışıb.
Noyabrın 9-da Rusiya, Azərbaycan və Ermənistan rəhbərliyinin imzaladığı bəyanatdan sonra Arayik Arutyunyan vəziyyət normallaşdıqdan sonra istefaya gedəcəyini vəd etmişdi.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
